film.gl
Nunatsinni filminut akissarsititsineq arfininngorpat pissaaq
Filminut akissarsititsissutaasartoq 'Innersuaq', kalaallit filmiliortartut kattuffiannit Film.gl-imit agguaanneqassaaq, qallunaallu filmiat takutinneqassalluni, taanna Ulannaq Ingemannimit assilisaavoq
Filmilianut akissarsititsissutaasartoq 'Innersuaq' kalaallit filmiliortartut kattuffiannit Film.gl-imit pingajussaanik tunniunneqassaaq.
Tamanna aqagu arfininngornermi Katuaq Kulturip Illorsuani Nuummi pissaaq - Hollywoodimi Oscarinik agguaassisoqarnissaa ullormik sioqqullugu.
Akissarsititineq ukiumut ataasiarluni filmimut ataatsimut, ingerlatsivimmut, inummut, suliniummut imaluunniit pilsersitsinermut, kalaallit filmiliortarneranni ukiumi siuliani sunniuteqarsimasumut tunniunneqartarpoq.
Anorak Film siorna piviusulersaarummik 'Sume - Mumisitsinerup Nipaa' suliaqarneranik akissarsitinneqarpoq.
Filmimik takutitsineq
Tassunga akissarsititsinermut atatillugu akeqanngitsumik filmertitsisoqassaaq.
Qallunaat filmiat Gudsforladt takutinneqassaaq. Filmi taanna kalaallimik filmiliortartumit Ulannaq Ingemannimit pingaarnertut assiliisuuffigineqarpoq.
Takutitsisoqannginnerani assiliisup nammineq filmi ilisaritillugulu suliaq oqaluttuarissavaa.
Filmi meeqqanut 15-it ataallugit ukiulinnut naleqqutinngitsoq aaqqissuisut ilisimatitsipput.