isumasioqatigiinneq
Nunatsinni angutit ikorfartoqatigiit pilersinneqalertut
Ulluni makkunani Kangerlussuarmi anguterpassuit ikorfartoqatigiinnik pilersitseqataanissaq siunertaralugu suliniuteqarlutik isumasioqatigiipput
Kangerlussuarmi ulluni makkunani angutinut ikorfartoqatigiinnut isumasioqatigiittoqarpoq.
Tassani aamma ilaqutariinnermut, isumaginninnermut inatsisinillu atuutsitsinermut naalakkersuisoq Martha Lund Olsen (S) peqataavoq.
Isumasioqatigiinnerup siunertaraa, oqallinnissaq aamma ikorfartueqatigiiffinnik pilersitsinissamik suliniuteqarneq.
Utaqqissanngitsoq
Isumasioqatigiinnermi pilersaarusiornermut akisussaasoq, Anda Poulsen, angutit atugarisaat pillugit nunatsinni oqallittariaqartugut oqarpoq.
- Pisortat utaqqiinnarnagit uagut angutit, sutigut atugarisatsigut pisariaqartitsinerput, nammineerluta aallartittariaqarparput ingerlatsilluta, isumasioqatigiinnermi ilaatigut taanna oqarpoq.
Inuiaqatigiit ineriartornerat
Angutinut ikorfartueqatigiinnik maanna pilersitsisoqarnera pingaaruteqartorujussuusoq, Martha Lund Olsen isumaqarpoq.
- Inuiaqatigiit ineriartoqqinnissaannut pingaaruteqartorujussuusoq. Angutit nipaasa tusaaneqarnissaat pisariaqartipparput, Martha Lund Olsen ilaatigut oqarpoq.