Periarfissat nutaat

Nunatsinni aallarnisaaneq suli atugaavallaanngilaq

Inuiaqatigiit aallarnisaanerup tungaatigut periarfissarujussuaq atunngilaat. Nunani Avannarlerni naalakkersuisut siunnersuisoqatigiivisa misissueqqissaarnerup suliakkiissutaata takutippaa.

Inuusuttut akornanni suliffissaaleqineq annertooq, amerlasuut appasissumik ilinniagallit aamma nuuttarneq annertooq. Tamakku nunap ilaatigut ajornartorsiutigai.

Tamatuma saniatigut inuussutissarsiutit tatisimaneqarput aamma aatsitassarsiorneq maannamut iluatsinneqarsimanngilaq. Suliffeqarfiit minnerit pilersinnerisigut ineriartornermik aamma suliffinnik pilersitsiffiusinnaasut ilagaat.

Ilinniartitsinermi amigaataasoq
Tassanerpiarli ajornartorsiortoqarpoq. Fonden for Entreprnørskabip Nunani Avannarlerni naalakkersuisut siunnersuisoqatigiivi suleqatigalugit nalunaarusiaata tamanna takutippaa.

Atuaruk: Aallartitsisoq qunusuitsoq qeqqussanik tunisassiulerniarpoq

Aallarnisaanerup atuarfimmi sammineqartarnera amigaataasoq nalunaarusiap takutippaa. Nalunaarusiarlu naapertorlugu GUX Nuuk atuarfinni kisiartaalluni aallarnisaanermut tunngasumik periusissiaqarpoq.

- Maannamut suli ataatsimoorussamik tamatumunnga tunngasumik periusissiamik aamma iliuuseqarnermik, ilinniarfeqarfiit, inuussutissarsiortut aamma pisortat tapersersugaannik peqannginnera unammilligassat annerpaartaraat, Christian Vintergaard, Fonden for Entreprenørskabimi pisortaq tusagassiuutinut nalunaarummi oqarpoq.

Periarfissaq annertooq
Aallarnisaanerup iluani ilinniarnikkut amigaateqarnerup aamma kinguneraa, suliffeqarfiit ikittuinnaat ilinniartunit aallartinneqartarnerat, nalunaarusiami allattut inerniliipput.

- Periarfissaq annertusoq ersarippoq, aningaasallu amerlanngitsut atorlugit aallarnisaasarneq ilinniartitsinermut ilanngunneqarsinnaavoq, ilinniartullu aallarnisaallutik suliffeqarfiliaannik tapersiilluni, Christian Vintergaard naqissusiivoq.

Ilinniartitsisoq aallarnisaanermut tunngasumik ilinniaqqittarnissaa nalunaarusiap innersuutigaa, tassami nunanit allanit misilittakkat takutippaat, inuusuttut ilinniarnerminni naapereersimagaangamikku suliffiit nutaat pilersartut.

- Taamaaliornikkut suliffinnik nutaanik pilersitsisoqarsinnaavoq, taakkulu ineriartornermut pitsaasumik sunniuteqarsinnaapput, Christian Vintergaard isumaqarpoq.

Tamatuma saniatigut Kalaallit Nunaanni aallarnisaanerup siuarsarniarlugu ataatsimut periusissiamik ujartuivoq.

Nalunaarusiap aallarnisaaneq pillugu Nunani Avannarlerni qeqertani arfineq-marlunni toqqarneqarsimasuni inuusuttut ilinniarfiini aamma ilinniaqqiffiusuni misissuiffigai. Qeqertat taakku tassapput Andøy (Norge), Pargas (Finland), Bornholm (Danmark), Gotland (Sverige), Savalimmiut, Kalaallit Nunaat aamma Island.

Powered by Labrador CMS