Nunatsinni aalisarnermut sunniuteqarluarsimasoq Petrus H. Biilmann

Hans Enoksenip aamma Petrus H. Biilmannimut eqqaaniutaa atuaruk:Nunatsinni aalisarnermik ilisimasaqarluartoq toquvoq

Petrus Holger Biilmann Maniitsumi inunngorpoq ulloq 20. september 1954, toqulluni Nuummi 10. april 2017, 62-nik ukioqarluni.

Inuusuttuaranngornissi tikillugu Petrus Atuarfik Kilaaseeqqami pitsaasumik tunniusimallunilu atuarpoq. Arlallit eqqaamassajunnarsivaat DR-p 1960-kkut naajartorneranni filmiliaani atuarfiup antsiartarfissuani atuartut inuusuttuaranngorlaat apersorneqartut siunissami sunngorusunnerannik aperineqarlutik, aperineqartunut ilaavoq Petrusi. Akissutaa tassaavoq; ”kontormand”, tassalumi atuarfik naammassigamiuk ingerlaqqittussanngoramilu Ikastimut allaffissorneq niivernerlu ilinniariartorpai, Ikastimilumi handelseksamen regnskabslinje tassa naatsorsuuserineq sallertut naammassilluarlugu.

Petrusip ilinniarnermi sulinermilu saniatigut ilisarnaatigilluinnarpaa timersornikkut eqeersimaartuunini. Pingaartumik aallutarai sisoraatinik arpannik (ujakkaarneq), taekwon-do aamma aasaanerani arpanneq. Sungiusariaatsit nutaat tappiffigai taakkulu timersoqatigisartakkaminut ingerlateqqinniartarpai. Kangiamiut timersoriaasiat Taekwon-do Ikastimi kalaallit ilinniartooqatini peqatigalugit tiguartiffigaa taakkuuppullu nunatsinni siullersaallutik qernertumik qiterutitaartut. Kingorna annertunerungaatsiartunik Petrusi ”ataqqinaammik” qiterutitaartinneqartarpoq. Ujakkaarnermi Maniitsormiut 1970-ikkunni nuimasumik inisissimajuarnerannut Petrus, ikinngunni Klaus Skifte ilagalugu, sunniuteqarnikooqaaq. Aaqqissuillaqqissuuvoq sukangasuumillu sungiusaalluni ikinngummi Kilaasip teknik samminerugaa, pikkoriffiilu taakku katinneqarmata angusat pitsaasut malinnaapput.

Petrusi KGH-mi 1970-kkut qiteqqunneranniit 80-kkut ingerlangaatsiarnerannut niivertussatut sulivoq. Taamatut siunertaqarluni ingerlavoq aalisarnermut sangunissami tungaanut. Ukiut taakku raajarniarneq alliartupiloorpoq ingerlatsiviillumi taamannaat pilersinneqarlutik. Nuuk Trawlip Sisimiuni allaffiani ingerlatsivoq saniatigut soorlu EH Lennertip aamma Asummiut allallumi piginnittui sullitaralugit. Taamanikkut sineriassorluni avataasiorlunilu raajarniarnermi kattuffiit aallartisarput kattuffiillumi ilaat AAK ukiorpaalunni siulersuisutigut peqataaffigaa allaallumi allaffissornikkut aamma sullillugu Nuummut nuussutigisaminik. AAK-mi sulinini ingerlalluareerlugu pisortaqarfimmut nuuppoq.

Aalisarnermik pisortaqarfimmi allaffiup pisortaatut 1990-ikkut aallartilaarneranni sulivoq. Taamanikkut aalisarnermut inatsit siulleq 1990-mi pileqqammerpoq inatsisitaallumi ivertinniarnerani pisoqarfiusaqisumi akuungaatsiarluni. Kingorna Polar-ikkut pingaartumillu Polar Saattuaq ukiorpaalukasinni sullippaa Nuummiit aallaaveqarluni.

Petrus H Biilmann ukiuni kingullerni tallimani aalisartut piniartullu kattuffitsinni KNAPK-mi initulluni sulivoq. Aalisarnermik ingerlatsisut tamarmik Petrusimik naammattuuinikut nalunngilluarpaat Petrus qanoq suliaminut tamatigoortumik aammali apeqqutini aalajangersimasuni iternga tikillugu qanoq ilisimasaqartigisoq. Assertorneqarsinnaanngitsumik nunarput inummik annertuumik piginnaasalimmik annaasaqarpoq. Ilinniarneruppat, timersorneruppat, sulineruppat minnerunngitsumillu ilaqutariinni qitiulluni ilaquttaminut qanilaartuulluni tunniusimallunilu inuuvoq.

Nunarput ernerulluartumik annaasaqarpoq. Toqunerata nalunaarutiginerata kingorna sineriassuatsinniit kattuffiup allaffianut inuulluaqqussutit qujaniutillu takkussortut – immikkut taagunngikkaluarlugit – amerlaqaat ataatsimullu eqillugit oqaatigissagutsigit oqaaseq uteqqiasoq unaavoq, Petrus QUJANAQ. Kattuffiup siulittaasuatut nulianut Sikamut meeraanullu tamanut ittussi aalisartunut tunniussarpassuinut aalisartuniit piniartuniillu qujaniarnerput matumuuna oqaatigigatsigu malugeqquarput. Petrusip eqqaaneqarnera ataqqinartuugili.