Nunat tamalaat isikkamik arsaannermi unammineranni Iluliarmiut peqataassapput

Nukappiaqqat 25-t Danmarkimut aallarput isikkamik arsaannermi nunat tamalaat unammineranni Euro-Sporting International Tournamentimut peqataajartorlutik.

Aalborgimi U12-it aamma U14-t unammeqataassapput, nunaniillu arlalinnit peqataaffigineqassaaq soorlu Danmarkimit, Frankrigimit, Luxemborgimit, Norgemit, Polenimit, Sverigemit Schweizimiillu peqataasoqassalluni. Unammisaqattaarnerni timersoqatigiiffiit assigiinngitsut 326-t peqataassapput.

Ullumi aallassapput
- Nukappiaqqat nunanit allaneersunut unamminissaminnut qilanaaqaat. Aamma Danmarkiliarnissaminnut utaqqisinnaanngillat, angalaqataasoq Laila R. Pedersen oqarpoq. Danmarkimut ullumi sisamanngornermi aallassapput.

Ilulissat illoqarfittut ikinngutigisaanniittumut Fredericiamut arfininngorpat sungiusaatigalugu unammissapput.

Unammersuaarneq nunanit tamalaanit peqataaffigineqartoq sisamanngorpat sapaatip akunnerata tulliani aallartissaaq. Frejas sportsparkimi Aalborgimiittumi unammersuaarneq ingerlanneqassaaq.