Nunat inoqqaavi
Nunat inoqqaavisa ulluat Naalagaaffiit Peqatigiiffiannit malunnartinneqarpoq
Ullumikkut Nunat inoqqaavisa ulloraat. - Pingaartitavut naleqartitavut tulluusimaarutigalugit saqqummertuartigit, ulloq manna pillugu Mimi Karlsen oqarpoq.
9. august ukiut tamaasa Naalagaaffiit Peqatigiivisa nunat tamalaat akornanni Nunat inoqqaavinut ulloritittarpaat.
Naalagaaffiit Peqatigiit Nunat inoqqaavisa pisinnaatitaaffii pillugit nalunaarutaat ukiut qulit matuma siorna Naalgaaffiit Peqatigiivisa ataatsimeersuarnerani akurineqarpoq.
Ulloq pingaartissallugu pissusissaqarpugut, Inatsisartuni ilaasortaq Mimi Karlsen (IA) oqarpoq.
- Ulloq manna pingaartissallugu pisariaqarpoq nunatsinni inoqqaajusugut pingaartitatta naleqartitattalu nittarsaannissaannut. Pingaartitavut naleqartitavut tulluusimaarutigalugit saqqummertuartigit. Ulluni makkunani ilaqutariippassuit piliniarsimallutik piliaminnik pilluaatiminnik nittarsaasarput. Tamakkuupput inuiattut pisinnaaffitsitut erligisassagut, ulloq manna pillugu tusagassiuutinut nalunaarummi oqarpoq.
Ullorli aamma immikkuullarissuuvoq, tassami Naalagaaffiit Peqatigiit Nunat inoqqaavisa pisinnaatitaaffii pillugit nalunaarutaat ukiut qulinngortorsiorpoq.
- Nalunaarutip suliarinerani atuutilerneraniillu angusat imaannaanngeqaat sulilu suliassaqarpugut pisinnaatitaaffii eqquutsinnissaannut. Ulloq manna pingaartorsiutigaara nunat inoqqaavisa ulluanni nunatta namminiilivinnissaanut tunngaviusumik inatsisissaq isumalioqatigiissitami aallartikkatsigu, taanna erseqqissaavoq.
- Qamuuna nunatut, inuiattut ingerlasimanerput tulluusimaarutigaara qilanaarlungalu tunngaviusumik inatsisiliornitsinni nunaqqatitsinnik peqataaffigilluarneqassalluta, Mimi Karlsen oqarpoq.