Nunat Avannarliit Killiit: Ilinniartitaaneq pillugu suleqatigiinnissaq ujartorneqarpoq
Ilinniartitaanerup tungaatigut suleqatigiinnerup pingaaruteqassusaa naalakkersuisumit Vivian Motzfeldtimit sulissutigineqarusuppoq
Ilinniartitaanermut, Ilageeqarnermut, Kultureqarnermut Nunanut Allanullu Naalakkersuisoq Vivian Motzfeldt septemberip sisamaanni Nunat Avannarliit Killiit Ukiumoortumik ataatsimiinneranni Savalimmiuni Tórshavnimi ingerlanneqartumi Savalimmiut Inuussutissarsiornermut Nunanullu allanut Naalakkersuisuat Islandimiullu Nunanut allanut Ministeriat Guðlaugur Þór Þórðarson peqatigalugit peqataavoq.
Nunani avannarlerneersut suleqatigiinnerunissaat, aamma ilinniartitaanerup tungaatigut, nukittorsarneqartariaqartoq oqalugiarnermini ilaatigut oqarpoq.
- Nunatta ineriartorneranut ilinniartitaaneq aalajangiissuulluinnarpoq, Kalaallit Nunaatalu imminut nammassinnaasumik aningaasatigut inissisimanissaanut ilinniartitaaneq pisariaqartinneqartumik toqqammavimmik pilersitsissaaq.
- Taakkuattaaq saniatigut ilinniartitaaneq aqqutigalugu ilisimasat piginnaasallu pisariaqartut nunap sumiiffiini politikkikkut inissisimanermut nutaamut pitsaanerpaamik angusaqarnissamut pisariaqartinneqartut pigisinnaannut piareersaataassallutik. Taamaattumik ilinniartitaaneq eqqarsaatigalugu suleqatigiinnissap ineriartortinnissaanut periarfissat pitsaasut takusinnaavakka, oqarpoq.
Ullup ingerlanerani kingusinnerusukkut Ilinniartitaanermut, Ilageeqarnermut, Kultureqarnermut Nunanullu Allanut Naalakkersuisoq Vivian Motzfeldt, Savalimmiut Inuussutissarsiornermut Nunanullu allanut Naalakkersuisuat Islandimiullu Nunanut allanut Ministeriat Guðlaugur Þór Þórðarson peqatigalugit ataatsimeeqatigiipput. Tassani ilaatigut takornariaqarneq, aningaasaqarneq, inuussutissarsiutit, kultureqarneq, brexit, imartat aningaasaqarnerat aammalu suleqatigiinneq ataatsimut isigalugu oqaluuserineqarlutik.