Nunat Avannarliit Killiit Siunnersuisoqatigiivi Arctic Circlemut attuumassuteqalerput

Nunat Avannarliit Killiit Siunnersuisoqatigiivi arfininngornermi januaarip 30-anni Islandimi oqaloqatigiittarfimmik Arctic Circlemik suleqatigiinnissamik isumaqatigiissuyteqarput.

Isumaqatigiissut atsiorneqarpoq Nunat Avannarliit Killiit Siunnersuisoqatigiivisa ulluni makkunani Islandimi Grindavikimi sammisaqarlutik ataatsimeersuarneranni.

Lars-Emiili

Isumaqatigiissut atsiorneqarpoq Arctic Circle sinnerlugu pisortaq Sigridur Blöndalimit, aamma Nunat Avannarliit Killiit Siunnersuisoqatigiivisa siulittaasuannit Lars-Emil Johansenimit.

Illua'tungeriit isumaqatigiissutigaat Nunat Avannarliit Killiit Siunnersuisoqatigiivi Arctic Circlep ukiumoortumik ataatsimiittarnerani kiisalu oqaloqatiginnittarfiup ataatsimiinnerini allani peqataasassasut.

Sammisat

– Isumaqatigiissutip kingunerisaanik Nunat Avannarliit Killiit Siunnersuisoqatigiivi isumasioqatigiinnernut, sammisaqarnernut, oqalugiartartunullu isumassarsianik siunnersuutinillu saqqummiussisassapput - isumaqatigiissutigineqarpallu aammalu tamatumunnga tunngavissaqarpat - ukiumoortumik ataatsimiinnerit akornanni suliniutinik aaqqissuussillutik, assersuutigalugu ataatsimiititaliamik pilersitsillkutik, Arctic Circlemi immikkut sammisassanik samminnittussamik, isumaqatigiissummi allassimavoq.

Pingaaruteqarluartoq

Lars-Emil Johansen isumaqarpoq isumaqatigiissut Nunat Avannarliit Killiit Siunnersuisoqatigiivinut pingaaruteqarluartuusoq.

– Issittumi sulinermi peqataanerulerlutalu saqqumilaarnerulissaagut. Isumaqarpunga tamanna pingaaruteqartorujussuusoq, Lars-Emil Johansen oqarpoq.

Pissusissamisoortoq

Sigridur Blöndal oqarpoq Nunat Avannarliit Killiit Siunnersuisoqatigiivisa taamatut isumaqatigiissuteqarnerat pissusissamisoortorujussuusoq, tassa siunnersuisoqatigiit Arctic Circlelu suleqatigiittorujussooreermata.

Oqaloqatiginnittarfik pituttorsimanngitsoq

Arctic Circle tamanut iluaqutaasussamik attuumassuteqanngitsumillu oqaloqatiginnittarfiuvoq.

Kingullermik 2015-imi ataatsimeersuarnermi nunat 40-t sinneqartut, ilaatigut Kina, Tyskland Frankrigilu, peqataapput

Arctic Circlep oqaloqatigiinneq siuarsagassaraa - aammalu siunissami nunat tamalaat Issittumik samminninnerat nukittorsassallugu.

Suleqatigiinneq

Nunat Avannarliit Killiit Siunnersuisoqatigiivi tassaavoq Kalaallit Nunaata, Islandip Savalimmiullu naalakkersuinikkut suleqatigiiffiat.

Siunnersuisoqatigiinnik siunertaavoq Nunat Avannarliit Killiit soqutigisaannik suleqatigiinnissaq, tamatumani ilanngulluguit Atlantikup Avannaani pisuussutit uumassusillit uumassuseqanngitsullu aammalu kulturip illersorneqarnissaat.

Tamatuma saniatigut nunat ilaasortat suleqatigiissutigaat nunat avannarliit killiit soqutigisaasa ineriartortinnissaat, Nunani Avannarlerni Killerni naalakkersuisut aqqutigalugit; pingaartumik pisuussutinik, mingutsitsinermik il.il. suliaqarniarnermi.