Nuuk
Nunasiaataasimanerup kinguneri pillugit taallianik atuffassineq isiginnaartitsinerlu
Atuakkiortoq Niviaq Korneliussen aamma isiginnaartitsisartoq Vivi Sørensen nunasiaataasimaneq pillugu taallianik atuffassillutillu isiginnaartitsissapput
Nunasiaataasimaneq kulturikkut illorsuarmi Katuami qulequtaritinneqassaaq illorsuarmi Katuami Nuummi ataasinngorpat. Tassani atuakkiortoq akissarsitinneqaqqammersoq Niviaq Korneliussen aamma isiginnaartitsisartoq Vivi Sørensen aaqqissuisuupput.
Tassani taallianik atuffassisoqarlunilu isiginnaartitsisoqassaaq.
Pikialaartitsineq 'Takunnittut – Nunasiaatiup panii'-nik qulequtaritinneqarpoq.
Unnukkut pikialaartitsinermi ilaatigut taallanik nutaanik atuffassisoqassaaq; Spoken Word-ertoqassaaq, tassaasoq taallanik erinnalimmik tusarnaartitsineq; taavalu monolog-imik Niviaq Korneliussenip allataanik, Vivi Sørensenillu takutitassaanik isiginnaartitsisoqassalluni.
25-nik ukiulik Niviaq Korneliussen atuakkiaminut 'Homo sapienne'-mut Statens Kunstfonds Legatudvalg for Litteraturimit akissarsitinneqaqqammerpoq.