VM-imut anngunniunneq
Nunarsuarmi pissartanut ajorsarujussuarput
Amerikap Nunavissuani Pissartanngorniunnermi kalaallit arnat assammik arsarlutik nunanut allanut unammisartut ajuunnernik 20-nik ajorsarput
Amerikap Nunavissuani Pissartanngorniunnermi, Cubami ingerlanneqartumi, naatsorsuutigineqareersimavoq kalaallit arnat assammik arsarlutik nunanut allanut unammisartut nunarsuarmi pissartanut Brasiliamut ajorsassasut.
Unamminerup immikkoortuata siulliup naanerani kalaallit ajuunnernik 12-inik kinguareerput. Brasilia ajuunnernik 20-nik ajugaalluni 32-12-mik ajugaavoq.
Kalaallini isertitsinersaapput Najaaja Lyberth, Panu Grønvold aamma Mia Rasmussen, tamarmik pingasunik isertitsillutik.
Pingasoriarluni unammereernermi Kalaallit Nunaat ataatsimik pointeqarpoq. Unamminermi siullermi kalaallit Paraguay-mut ajorsarput, unamminerullu aappaani Venezuela-mut naligiiginnarlutik.
Kalaallit ullumi sapaammi USA unammissavaat, unamminerlu aallartissaaq nunatta nalunaaqutaa malillugu nal. 13.