Nunarsuarmi kingornussassat
Nunarsuarmi kingornussassanngortitsineq borgmesterip tulluusimaarutigaa
Kiista P. Isaksenip Kujataa pisortatigoortumik nunarsuarmi kingornussassanut ilanngunneqarnera periarfissatsialattut isigaa.
Kujataani nunaateqarfiit kangerluttai kusanassusaat pillugit kinguaariinnut tulliuttunut kingornussassanngortinneqarput.
Igalikup Kangerlua Tunulliarfimmilu nunaminertat pisortatigoortumik nunarsuarmi kingornussassatut akuerineqaqqammerput.
Borgmester Kiista P. Isaksenilu (S) Verdensarvskomiteen Karkow-imi Polenimiittumi ataatsimeeqatigiartorsimavai.
- Assorsuaq tulluusimaarpunga siulivut, uagullu ullumikkut inuusugut ukiut 1000-it sinnerlugit siulitta aammalumi qallunaatsiat nunatsinni najugaqarsimanerinut uppernarsaatit paarilluarsinnaasimagatsigit, tanngassimaangaarlungalu oqarsinnaavunga tamanna ullumikkut akissarsissutigigipput naleqangaartumik, taanna tusagassiuutinut nalunaarummi allappoq.
Pisortatigoortumillu naqissusiineq kulturikkut kingornussassanut takornarialerinermulli immikkut iliuuseqarnissamut aallarniutaasutut taassuma isigai.
- Tassami UNESCO-p allattorsimaffianiinneq, taamaalillunilu nunarsuarmiut kingornussassaannik peqartutut oqarsinnaalerneq ataqqinaataavoq annertooq atorluaraannilu kommunimut, kommunimi inuussutissarsiornermik ingerlataqartunut, matumani pingaartumik takornariaqarnermik inuussutissarsiuteqartunut aammalumi nunatsinnut tamarmut sutigut tamatigut iluaqutissiisussaq.
- Taamaammat ullumikkut qinnuteqaatitta akuerineqarnera aallaavigalugu annertuumik inerisaassaagut uagutsinnut kingulissatsinnullu annerpaamik iluaqutaasinnaaqqullugu, taanna nangilluni allappoq.