Nunarsuami Danmarki peqquserluffiunnginnerpaasutut toqqagaaqqippoq

Danmarki Nunarsutsinni peqquserluffiunnginnersaavoq. Tamanna pissaanermik atornerluinerit, isertortumik isumaqatigiissusiortarnerit kiisalu peqquserlunnerit pillugit misissuinerni ersiutaavoq.

Peqquserluttoqannginnissaanik suliniartoq Transparency International misissuisuuvoq. Misissuisimaneq pingasunngornermi saqqummiunneqarpoq.

Misissuinermi Kalaallit Nunaat peqataatinneqanngilaq.

Danmarki tassa siuttuuvoq, nunat tulliupput New Zealand, Finland, Sverige aamma Norge. Misissuinermi 100-nik pointinnattoqarsinnaavoq, Danmark 92-nik pointinnappoq. Taamaasilluni Danmark ukioq kingullermi pointimik ataatsimik amerleriarpoq. New Zealandilu ukioq kingulleq naligiillutik nunani peqquserluffiunnginnersaapput.

Misissuinermi nunat peqquserluffiunersaasut tassaapput Somalia, Nordkorea aamma Sudan. Taakkuupput nunat peqquserluffiunerpaat.

- Peqquserluttarnerit aningaasarsiornermut ajoqqutaapput. Nunat ineriartorfiusut peqquserluffiunnginnissaat EU-mit USA-miillu piumasarineqarpoq. Tamanna suleqatigiinnikkut qaangerneqarsinnaavoq, Transparency Internationalip pisortaa Robin Hodess oqarpoq.

Danmarki assigalugu akileraartarnerit ammasuutinneqartariaqartut siunnersuutigaa. Tassani suliffeqarfissuit akileraartarnerat takuneqarsinnaalernissaa sulissutigineqartariaqartoq oqaatigaa. Tassani nunat aningaasaateqarnerpaat 20-t suleqatigiittariaqartut siunnersuutigaa. Taamaasilluni peqquserluttoqarneranik misissuinerit ajornannginnerusumik takuneqarsinnaalissapput.

Tyrkiet aamma Kina appariangaatsiarput.

Tyrkiet 45-nik pointinnappoq, 2013-mit pointinik tallimanik ikinnerulerluni. Tyrkiami naalakkersuisut peqquserlussimaneranik suliaqartoqarsimanera pissutaavoq.

Kina 36-nik pointinnappoq naak naalakkersuisut peqquserluttarneq annertuumik anigorniarlugu suliaqarsimagaluartut.

Nunat amerlasuut 50 pointi ataallugu pissarsitinneqarput. 100 pointersimagaanni isumaqarpoq nuna peqquserluffiunngitsoq. Pointinnassimanngikkaanni nuna peqquserluffiungaatsiartutut nalilerneqartarpoq.

Europami Ukraine angusarlunnerpaavoq. Nuna 26 pointiinnarnik tunineqarpoq. Italia, Grækenlandi aamma Rumaania 43-nik tamarmik tunineqarput.