Nunarput tamakkerlugu 4G atuutilerpoq
Tele-Postip nunaqarfik kingulleq 2G-miit 4G-mut nutarteriffigeqqammerpaa. Attaveqaat nutaaq taanna 5G-mut piareeqqareersuuvoq.
Pingasunngorneq novembarip arfineq-aappaat Qeqertami mobilillit kingullertut 4G-mobildatamut manna tikillugu sukkassusaasumit hundredelinnik arlalissuarnik sukkanerusumut attavilerneqarput, 2G-mit 889-eriaammik sukkanerusumik. Tele-Post tusagassiuutinut nalunaarummi taama ilisimatitsivoq.
Kalaallit Nunaata 4G-mik mobilinut attaveqaataata nutaap, maanna Avannaani Siorapalummiit Nunatta Kujataani Aappilattumut isorartussuseq 2.500 kilometeri aammalu Tunumi sineriak attaveqartilerpaa.
Anguniagaq anguneqartoq
Tele-Postip periusissiaani anguniakkat ilagaat innuttaasut 92 procentiisa 2020 nallertinnagu sukkasuumik interneteqalernissaat, Mobile Firstillu suliarineqarnerata naammassisarneqarnerani innuttaasut 92 procentii ullumikkut mobildatami sukkassutsit Europami sumiiffinnit amerlanernit sukkanerusut atorsinnaalerpaat.
- Neriuutigissallugu qunugisimavara attaviup taama sukkatigisup najugaqarfinnut taama amerlatigisunut ukioq manna naammassisimanissaa, pisortaaneq Kristian Reinert Davidsen oqarpoq.
- Attaveqaatip pitsanngortinnissaa maanna aallartissavarput, aamma nunami innuttaasunut tamanut nioqqutit nutaat periarfissarsiuunnissaat paasiniassavarput, pisortaaneq oqarpoq.
5G-mut nuunnissamut piareerlugit
Nunatsinni sumiiffinni assigiinngitsuni 119-ini Tele-Postip, Ericssonip aammalu AK Montagep qaammatit arfinilissaat avillugu sivisussusilimmik mobilinut antennet taarsersorpaat. Nunatta silaannakkut attaveqaataa nutaaq siunissamut qulakkiigaavoq, tassa 5G-mut nuunneqarsinnaagami.
Tele-Postip sullissaasa 8 procentii Tunumi aammalu Qaanaap eqqaani najugaqarput. Tamaani mobilillit qaammataasakkoorlugu attaveqaatikkut sukkaannerusukkut 4G-qalissapput.
- Sumiiffinni qaammataasakkut attaveqartuni TELE-POST-ip sullissaasa taamaattoq iluaqutigissavaat Upernaviup eqqaani innuttaasut qaammataasakkut attavimmik tigooraajunnaarnissaat, ingerlatseqatigiiffik ilisimatitsivoq.
Sinneranit malunnaatilimmik kigaannerusoq
8 procentit taakku mobilinut attaveqaammik pitsaanerulersitsissapput, taamaattorli nunap sinneranut naleqqiullugu suli sukkaannerungaatsiartussaassaaq qaammataasakkoortuunera pissutigalugu.
Sumiiffiit tamakku attaveqaataasa pitsaassusaanik pitsanngortitsisussanik aaqqiissutissanik suli suliaqartoqartoq, Tele-Postip erseqqissaatigaa.