ataavartumik nukissiorneq

Nunarput sisamanngormat mingutsitsinnginnerulaalerpoq

Atortunik assigiinngitsunik atuilluni suliniut Nukissiorfiit ippassaq atoqqaartippaa, issittumilu piujuaannartitsisumik nukissiorneq pitsaanerpaaq qulakkeerlugu.

Seqernup qinnguaanit tigooraasut atoqqaartinneqarneranni Igalikumi takuneqarsinnaapput Peter Jensen, Inuk MediaSeqernup qinnguaanit tigooraasut 620 kvadratmeteriupput NukissiorfiitAtoqqaarfissiortitsinermi silagippoq Peter Jensen, Inuk MediaPisortaq Michael Pedersen qeqqani takuneqarsinnaavoq Peter Jensen, Inuk MediaAtoqqaartitsinermi eqqissisimaartoqarpoq Peter Jensen, Inuk MediaNunaminertami 1.400 kvadratmeterisut annertutigisumi inissisimapput Peter Jensen, Inuk Media

Nukissiuuteqarfik saqqummiunneqarmat nunaqarfimmi Igalikumi inuit 100-t missaanniittut ornigupput. Seqineq, anori aamma batteeriisivik sarfaliuullu atorneqarput, tamannali dieselimik atuinermut annikillisaataanngaatsiarpoq.

Mingutsitsinngitsumik nukissiorniarnermut seqernup qinnguaanit tigooraasut 620 kvadratmeteriusut qitiupput. Nunaminertami 1.400 kvadratmeterisut annertussuseqartumi napparneqarsimasut. Seqernup qinnguaanit tigooraasut qaavinnut anorisaatit sanimukartut 67-it ikkussuunneqarput.

Batteriinut toqqorsiviup nukissiaq katersortarpaat, tassa seqerngup qinnguaanit tigooraasut aamma/imaluunniit anorisaatit nioqqutissiarisaat nunaqarfimmi atuisartunit ingerlaannartumik atorneqanngitsoq.

Sisamanngornermi atoqqaartitsinermi nukissiorfiup pisortaa Michael Pedersen oqalugiarpoq, anguniakkallu annertupput.

- Ullumikkut uagut Nukissiorfiit atortut assigiinngitsut ataqatigiissillugit atorlugit suliniut siullerpaaq atoqqaartipparput maani nunaqarfimmi pinneqisumi – Igalikumi. Suliniutip Nukissiorfinni suliarisartakkavut tamaasa kusanarluinnartumik takutippai aamma suut uagutsinnut ilisarnaataanersut, Michael Pedersen oqarpoq, anguniakkallu pingasut taakkartorpai:

- Tassa uagut Nukissiorfiit Kalaallit Nunaat qorsuunerulersippaat
- Tassa uagut Nukissiorfinni piareersimaffigaarput periarfissanik nutaanik aamma aaqqiissutissanik nutaanik isiginninniarnissarput
- Tassa uagut Nukissiorfinni nalilinnik pilersitsisarpugut ilisimasaq aamma assigiinngitsunik immikkut ilisimasaqartut suleqatigiitsillugit.

- Seqernernaniluunniit anorlinngippat kiisalu batteriit nukissamik imaarussimallutik, taava nunaqarfimmik sarfamik pilersuinermut dieselgeneratori atorneqalissaaq. Nukissiorfinnit naatsorsuutigineqarpoq upernariartornerani siusissukkut ukiariartornerani kingusissukkut nukissiap ilaa malunnaateqarluartumik seqinermit imaluunniit anorimit nioqqutissiarineqarsinnaasoq. Tamatumalu kingunerisaanik dieseluulia pisariaqartinneqartoq annikinnerussalluni, pisortaq oqalugiarnermini naqissusiivoq.

Tamanna misiliutitut suliniutaavoq, Nukissiorfiullu annertuumik iliuuseqarfigalugu ineriartortillugulu pitsanngorsarniarpaa - ataavartumik nukissiuutit allat aamma atorlugit.

Powered by Labrador CMS