bæredygtighed
Nunarput qilalukkanik aarrinillu piniarnerminut isornartorsiorneqartoq
Piniarneq piujuartitsinermik tunngaveqarunnaarpoq, WWF taama aarlerisaarivoq
Pinngortitaleriffiup aamma nunat Naalagaaffiit Peqatigiit uumasut naasullu nungutaanissamut ulorianartorsiortut pillugit isumaqatigiissutaannut CITES-imut ilaasut nalunaarutaannut qisuariaateqarluni pinngortitaq pillugu nunarsuaq tamakkerlugu suliniaqatigiiffik WWF taama aarlerisaaruteqarpoq.
Nunat CITES-imut ilaasut Afrika Kujallermi ataatsimeersuarnertik naammassissavaat.
Atuaruk: Nungusaataasumik aaffanniarneq
Ernumasut
- Nunatsinni qilalukkanik qernertanik aarrinillu piniarneq ukiuni arlalinni pitsaasumik ingerlasimavoq. Pinngortitaleriffiulli maanna erseqqissaatigaa uumassusilinnik ilisimatuut siunnersuinerat qaangerlugu 2013-2015-imi pisassiissuteqartoqartoq, WWF ernumassuteqartoq taama ilisimatitsivoq, taamatullu ukioq manna pisassiissutitut siunnersuutigineqartut qaangeqqagaa maluginiaqquaa.
Atuaruk: Ukiumi aaffattassat Krusep aalajangerpai
- Kalaallit Nunaanni piniakkanik aqutsinerup ukiuni makkunani allanngornera ajoraluartumik takusinnaavarput. Piujuaannartitsinissaq tunngaviginagu piniartoqarnera uumasoqassutsimut takornariartitsisullu tammajuitsussanik tuniniaanissaannut ajoqutaaginnarani aamma Kalaallit Nunaata isigineqarneranik innarliivoq. Siunissamilu aamma meeqqagut ernuttagullu issittumi pinngortitap nalituujutaanik atorluaanissamut periarfissaat ajornerulerneranik kinguneqassapput, Kaare Winther Hansen WWF-ip Nuummi immikkoortortaqarfianeersoq taama oqarpoq.
Atuaruk: Upernavimmi qernertanik qilalugartassat nungupput
Ajorsimasinnaanngikkaluartoq
WWF naapertorlugu pinngortitaleriffiup uparuarpaa, piniarnermi uumasut annaaneqartussat pisassiissutini eqqarsaatigineqarsimagaluarpata, aarrit ajunngitsumik nalilerneqarsimassagaluartut.
Taamaattumillu WWF-ip tupigusuutigaa, Naalakkersuisut aarrinit avammut tunisinermut utaqqiisaasumik unitsitsigallarnermik taamaallaat qisuariaateqarmata.
- Pisassiissutit ikilinerinut taarsiullugu avammut tunisinermut taamaatitsipput. Tamanna qilaamut kuuttumut siparniliiginnarluni aaqqiinermut assersuunneqarsinnaavoq. Tamannalu iluamik aaqqiinerunngilaq, ilimagaaralu Naalakkersuisut tamanna nalunngikkaat, Kaare Winther Hansen oqarpoq.