paarlaaneq
Nunarput nutaamik meeqqanut illersuisoqalerpoq
Aaja Chemnitz Larsenimut paarlattaalersussamik nassaartoqarpoq. Aviâja Egede Lynge Naalakkersuisunit toqqarneqarpoq
Aviâja Egede Lynge.
Tassaavoq Kalaallit Nunaanni meeqqanut illersuisuulersussaq.
Meeqqat illersuisorisimasaat Aaja Chemnitz Larsen Inatsisartuni Inuit Ataqatigiit tunuliaqutaralugit ilaasortaavoq maannakkut. Meeqqanut illersuisuuvoq 2012-mit 2015 ilanngullugu.
Aviâja Egede Lynge ukiuni pingasuni atuuttussatut 1. juni 2015-miit atuuttussanngorlugu Naalakkersuisunit toqqarneqarpoq.
Meeqqanut Illersuisutut atorfillip meeqqat inuusuttuaqqallu pisinnaatitaaffii soqutigisaallu aallaavigalugit sulisussaavoq, meeqqallu soqutigisaat tunngavigalugit pisinnaatitaaffiinik qaammarsaasussaalluni. Meeqqat aqqutit suut atorlugit naamagittaalliuteqarsinnaanersut tamatigullu isummaminnik tusaaniarneqartarnissaat qulakkeerinninniaqataaffigisartussaavaa.
Tamatuma saniatigut pineqartoq Meeqqat pillugit Siunnersuisoqatigiinnut siulittaasuuvoq. Meeqqat sinnerlugit oqaaseqartartuullunilu pisinnaatitaaffiilu pillugit illersuisuulluni.
- Uannut pingaaruteqartuuvoq meeqqat isiginiarneqarlutillu tusaaniarneqartarnissaat. Meeraq kinaluunniit inuttut kinaassutsini aallaavigalugu pisinnaatitaaffeqarpoq – aammalu meeqqat tamaasa inissaqartittussaavagut, apeqqutaatinnagu kikkuunersut qanorlu ittuunersut, Aviâja Egede Lynge oqaaseqarpoq.