Wednesday, October 11, 2017 - 07:38

Nunarput Nunani Avannarlerni nikallanganartunik inissisimaffeqartoq

Kisitsisit atorlugit nassuiaasiornerit Nunat Avannarliit atukkat assersuunneqarsinnaasut nutaat qimerlooraanni, Nunarput assigiinngitsutigut ajortumik ingerlavoq.

Nunani Avannarlerni Naalakkersuisut Siunnersuisoqatigiivisa Nordisk Statistik 2017 nassiuteqammerpaat, tassanilu kisitsisit qimerloorneqarsinnaapput, nunallu akornanni suut assigiinngissutaanersut paasineqarsinnaallutik.

Assigiinnginnerpaat
Inuiaqatigiinni assigiinngittoqarneranut tunngatillugu, Nunarput ajoraluartumik siuttuuvoq.

- Savalimmiuni assigiinnginneq minnerpaavoq, 2015-imi gini-koefficient 0,23-miilluni. Assigiinngissutsip annersaa Kalaallit Nunaanniippoq, siunnersuisoqatigiit tusagassiuutinut nalunaarummi allapput.

Takusassiami allami – agguaqatigiisillugu ukiut inuuffiit – qiviaraanni, Kalaallit Nunaat Nunanut Avannarlernut allanut sanilliullugu nalinginnaanngitsumik ajorluinnarpoq.

- Nukappiaraq Kalaallit Nunaanni inoorlaap taamaallaat 70-ip missaannik ukioqalernissani naatsorsuutigisinnaavaa, nunanilu avannarlerni agguaqatigiisillugu angutinit ukiunik qulinik appasinneruvoq, tassa 80-iliisaramik, tamanna tusagassiuutinut nalunaarummi oqaatigineqarpoq.

Aningaasaqarneq pitsaasoq
Aningaasaqarnermut tunngatillugu Nunat Avannarliit ataatsimut isigalugu ajunngitsumik ingerlapput.

- Nunat Avannarlerneersut ataatsimut isigalugu nioqqutissat avammut tunineqartut eqqussorneqartunit amerlanerupput, niuernikkut taamaammat sinneqartoorpugut. Niuernerup 20 procentiisa missaat nunat avannarliit akornanni pisarpoq. Nunat Avannarliit Tyskland niueqataasa annersaraat, 13 procentimik tunisiffiusarpoq, 18 procentiinillu eqqussuiffiulluni, tassani atuarneqarsinnaavoq. 

Kisitsisit atorlugit takusassiat nammineq qimerluukkit: Nordisk Statistik 2017

Seneste nyheder / Nutaarsiassat kingulliit