Nunarput nammineq avaleraasartuut pillugit isumaqatiginninniarsinnaasoq

Kalaallit Nunaat avaleraasartoortassanik amerlanerusunik piumasaqassappat Danmarkimit tamakkiisumik illersorneqassaaq.

Fødevareminister Dan Jørgensen, Socialdemokratineersoq Sara Olsvigimut Inuit Ataqatigiinneersumut allappoq.

Sara Olsvig ministerimut apeqquteqarnikuuvoq Norge, Savalimmiut EU-llu avaleraasartuut pillugit isumaqatigiissutaat qanoq isumaqarfigineraa. Imminnut isumaqatigiissuteqarput imartaminni aalisassanatik, kiisalu misileraalluni avaleraasartoorniat isumaqatigiissuteqarfimmeereersut 4.000 tonsinik pisaqarsinnaasut isumaqatigiillutik.

Avaleraasartuut pillugit isumaqatigiittut tassa Norge, Savalimmiut EU-lu Kalaallit Nunaallu isumaqatigiinnginnerat malinnaaffigilluarneqarsimasoq Dan Jørgensenip oqaatigaa.

- EU, Norge Savalimmiormiullu imminnut avaleraasartuut pillugit isumaqatigiissuteqarput, tassanilu Danmark peqataanngilaq.

Kalaallit Nunaat arlaannik piumasaqassappat Danmarki illersuissasoq oqarpoq.

Misileraalluni aalisarnerit

Kalaallit Nunaanni misileraalluni avaleraasartuut pisarineqartut annertuallaartut EU isumaqarpoq.

- 100.000 tonsinik misileraalluni aalisarnerit annertuallaarput. Aamma ilumut pissusissamisoortuunersoq EU-mit qularineqarpoq. Misileraalluni aalisarnerit 4.000 tonsit pisarisimagaanni EU-mit nalilerneqartarpoq misileraalluni aalisartoqarsimasoq, Dan Jørgensen allappoq.

Nunani isumaqatigiissuteqarfigisimanngisami misileraalluni imartaanni aalisarnerit isumaqatigiissusiortarnernut apeqqusiisoq EU nalileereerpoq.

EU, Savalimmiut Norgellu isumaqatigiissimanerat Kalaallit Nunaannut qanoq sunniuteqassanersoq fødevareministeriaqarfimmit Namminersorlutik Oqartussanut nalilersueqqusivoq.

Finnip isumaqatigiittoqarsimaneranut isumaa
- Kikkut qanorlu isumaqatigiittoqarsimanera aalisarnermut nunalerinermullu naalakkersuisup Finn Karlsenip Kalaallit Nunaannut sunniuteqarnavianngitsoq oqaatigereerpaa, Finn Karlsen Dan Jørgensenimut allappoq.

- Isumaqatigiissuteqartut aalisariutaat nunatta imartaani avaleraasartoorniarnissamut naammanngillat. Kalaallit Nunaanni avaleraasartoorniarnermi aalisariutigineqartartut 2011-mi isumaqatigiissutaareerput, taakkuli Islandermiut, russinik kiniiserinillu isumaqatigiissutaapput, aamma isumaqatigiissutip saniatigut EU 2012-mi 2013-milu misileraalluni aalisarnermut 1.400 tonsinik aalisagartassinneqareerpoq. Tamanna 2014-mi allanngornavianngilaq, taamaattumik qanoq isumaqatigiittoqarsimaneranik nunatsinnut qanoq sunniisinnaanera oqaatigineqarsinnaanani, Finn Karlsen allappoq.

Politikkikkut takutitsinerlunneq
Naalakkersuisup taama isummesornera takutitsinerlunneruvoq. Kalaallit Nunaanni aalisakkamik nutaamik aalisartalernissamut misileraaleruttorpoq, maannakkullu qanoq avaleraasartooqartiginersoq imartatsinni misissorneqaleruttorluni.

Sooq imartaqarfinneersut isumaqatigiissusiorfigineqarsimannginnersut paasiuminaatsinneqarpoq Naalakkersuisunit. Ilumut nutaanik isumaqatigiittoqassanersoq taamaasilluni apeqquserneqarpoq, isumaqatigiissuteqartut pillugit Finn Karlsen allappoq.