Nittarsaassineq
Nunarput Japanimi annertuumik nittarsaanneqalerpoq
Nunatta Japanimi niuerneq siuarsarniarlugu nittarsaassinissaa kunngissakkut Naalakkersuisullu siulittaasuat Kim Kielsen Siumumeersoq siuttoralugit Tokyomi sisamanngorpat aallartissaaq
Naalakkersuisut siulittaasuat Kim Kielsen aamma aalisarnermut, piniarnermut nunalerinermullu naalakkersuisoq Karl-Kristian Kruse, tamarmik Siumumeersut, kunngissakkut peqatigalugit nunatta Japanimi niuerneq siuarsarniarlugu, qalerualinnik nunatsinneersunik puisillu amiinit tunisassianik kiisalu takornarissat amerlanerusut nunatsinnukarusulersinnissaat siunertaralugu nittarsaassinissaa ulluni 25. aamma 29. marts ingerlanneqartussaq siuttuuffigissavaat.
- Japan niuerfigissallugu nunatsinnut soqutiginaateqarpoq – nunat Asiamiittut allat peqatigalugit – Japanimi pisisartorpassuaqarmat, akunnattumik aningaasarsiallit ilanngullugit. Taakkuuppullu nunatsinnit nerisassianik nuerfigissallugit soqutiginaateqarluinnartut.
Taama Namminersorlutik Oqartussat tusagassiuutinut nalunaaruteqarlutik allapput.
Japanimiut kalaallillu ullumikkut suleqatigiinnerat Polar Seafoodip aamma Royal Greenlandip qalerualinnik Japanimut tuniniaanerannik imaqarpoq.
Kalaallit kulturiat sammillugu
Kunngissakkut niuernermi nittarsaassinermi aamma peqataassapput, pilersaarutaavorlu niuerneq kulturilu sammillugit aaqqissuussisoqarnissaa.
Kunngissakkut nunatsinni inuiaqatigiinni ilukkut tarnikkullu tunngasut aallaavigalugit saqqummersitsineq tallimanngorpat ammassavaat.
- Kunngikkormiutut ataqqinassusilik Prinsgemalen aamma Kunngikkormiutut ataqqinassusilik prinsesse Takamado kiinarpaat tupilaallu nunatsinneersut inussiarnisaarlutik atukkiussimavaat, Namminersorlutik Oqartussat allapput.
Saqqummersitsinermi etnografimut tunngasunik aamma immikkoortortaqassaaq, aammalu Nunatta Katersugaasiviata saqqummersitaa 'Qanga - tegnet fortid', nunatta oqaluttuarisaanerannik atuakkiamut Nuka Godtfredsenip akvareliliaanik imaqartoq.
Atuaruk: Aallartitat nunarput japanimiunut nittarsaatissavaat
Nanook aamma Nive Nielsen
Nipilersortartut Nanook aamma Nive Nielsen and the Deer Children aamma angalaqataapput, taakkulu aallartitaqarfimmi tikilluaqqusilluni katerisimaartitsinermi sisamanngornermi appisimaassapput. Kalaallit taakkua nipilersortartut aamma japanimiunut tamanut ammasumik aaqqissuussami tusarnaartitsissapput.
Nunatta Japanimi niuerneq siuarsarniarlugu nittarsaassinissaa Sermitsiami allaserineqarnera atuaruk, aviisi uani pisiarisinnaavat: