Nunarput ilimagisamit qanga kiannerusimavoq

Ilisimatuussutsikkut misissuineq nutaaq sermersuup qanoq sukkatigisumik aakkiartornissanut siulittuinermut atorneqassaaq

Piffissami sermersuaqarnerani Kalaallit Nunaat issaasallunilu kialaarnikuusoq qangali ilisimaneqarpoq. Kisianni maanna ilisimatusarnerup nutaap takutippaa, ilimagineqartumit suli kiannerusimasoq.

Ilisimatuut Northwestern University USA-meersut, piffissami kiannerusumit takussutissat Nunatta kitaata avannaani tatsimi marrammit assallugit katersorsimavaat. Inernerit atuagassiami PNAS-imi, Proceedings of the National Academy of Sciencesimi, saqqummiunneqaqqammerput.

Tatsip naqqa atalluarsimangaarmat, ilisimatuut assallutik ukiut hunnorujulikkaanik tusintit sinnerlugit pisoqaassusilimmik assaasimapput.

Piffissami sermersuaqarfiusuni marlunni ukiut 116.000-t 130.000-t tikillugit matuma siorna aamma ukiut 8.000-t 11.000-t tikillugit pisoqaassusilinni aasaanerani kiassutsit 4 gradit aamma 8,5 gradit akornanni ullumikkornit kiannerusimavoq.

Sullernit assigiinngitsut sinnikui taama kiassimatigineranik takussutissiipput. Tassami taakku kiassutsit 10 gradinik kiannerusumi uumasinnaagamik.

Kiassutsit taakku qaffasissut Camp Centuryp nalaani sermersuaq piffissami ukiut 100.000-t matuma siorna taama aminnerulersimatigineranut nassuiaatissaapput.

Taamaalilluni paasissutissat nutaat ilisimasuut eqqornerusunik sermersuup qanoq ililluni kiannerulernerani qisuariarnissaanut siulittuisinnaanerannut iluaqutaassapput.

Powered by Labrador CMS