københavn
Nunarput Danmarkilu aningaasaqarneq pillugu suleqatigiinniarput
Nunatta aningaasaqarnera ima ilungersunartorsiorfiutigivoq nunatta Danmarkillu aningaasaqarneq pillugu suleqatigiittariaqalernerannik, taama nunat taakkua marluk siuttui pingasunngornermi ataatsimeeqatigiikkamik isumaqatigiissuteqarput
Naalakkersuisut isertitat aningaasartuutillu nammaqatigiisinniarnissaannut annertuumik suliassaqarput, nunatta innuttaanit 56.000-jusunit utoqqalisartut amerliartornerisa saniatigut. Taamaattumik qallunaat naalakkersuisui Naalakkersuisunik suleqaterusupput.
Taama statsminister Helle Thorning-Schmidt Socialdemokratineersoq Naalakkersuisut siulittaasuannik Siumumeersumik Kim Kielsenimik ataatsimeeqateqareerluni oqarpoq.
- Utoqqaat amerliartorput aningaasarsiorsinnaasullu ikiliartorlutik. Naalakkersuisullu suliassaasa tamakkua ilagivaat. Naalakkersuisut siulittaasuallu isumaqatigiissutigaarput qallunaat naalakkersuisui aamma Naalakkersuisut qanimut suleqatigiissasut, Helle Thorning-Schmidt oqarpoq.
Ministerinik ataatsimeeqateqatigineqassapput
Taamaattumik Naalakkersuisuini ilaasortat arlallit qallunaat ministeriinik ataatsimeeqateqartarniarput. Nunanut allanut naalakkersuisoq Vittus Qujaukitsoq, Siumut, inatsisisunut atortitsinermut ministerimik Mette Frederiksenimik Socialdemokraatineersumik, kiisalu nunanut allanut ministerimik Martin Lidegaardimik Radikale Venstremeersumik sisamanngornermi ataatsimeeqateqateqassaaq.
Kim Kielsenip nassuerutigaa nunatta aningaasaqarnera unamminartorsiortinneqartoq. Taamaattumillu aamma Naalakkersuisut iliuusissanik pilersaaruteqartut nassuiaatigalugu.
- Aaqqissuusseqqinnerit assigiinngitsut, siumut aallariarnissamut suliffissanillu pilersitsinissamut siunertallit, ingerlanneqassapput Kim Kielsen oqarpoq.
Danskit naalagaaffiannit EU-miillu katillugit Kalaallit Nunaat ukiumut 4,7 milliardinik tapiissutinnattarpoq. Tamanna naalagaaffimmi tunisat ataatsimut nalingat 35 procenteraat.
Oliamik gassimillu nassaartoqassangaluarpat aatsitassarsiortoqalerlunilu, soorlu aatsitassanik qaqutigoortunik, kuultinik, zinkinik, savimernik, rubininilluunniit taava ilisimatuut oqarnerat naapertorlugu aatsaat ukiorpaaluit qaangiupatta nunarput isertitsiortulersinnaavoq.