naatsorsuutit
Nunarput BankNordikip naatsorsuutaanut pitsaasumik sunniuteqartoq
Kalaallit Nunaat BankNordikimi aatsaat taama angusarissaartigaaq, ukiumut naatsorsuutini tamanna takuneqarsinnaavoq.
Kalaallit Nunaanni sullitat amerlanerusut aamma taarsigassarsititsinerit amerlanerusut aningaaserivimmi pisortaanerup Árni Ellefsenip nuannaarutigai, tusagassiuutinut nalunaarummi tamma takuneqarsinnaavoq, appartitsinerit pitinnagit ingerlatsinerup inernera 179 millionit koruuniusut, akileraannginnermilu 277 millionit koruuniusut tassani ilisimatitsissutigineqarpoq.
2016-imi BankNordikip ingerlatsinerani pisut marluk immikkut maluginiagassaapput: Islandimi sillimmasiisarfiup Vørðurip tuninera inaarneqarpoq, Danmarkimilu inuussutissarsiortunik sullissinerup atorunnaarsinneqarnera. Allannguutit tamakku kingunerannik ingerlatseqatigiiffiup suliai nalorninaateqannginnerujussuupput.
Katillugit 300 millionit koruunit piginneqataasunut iluanaarutitut aningaasarsiaritinneqassapput.
''Inissisimaneq nukittunerusoq''
- Piginneqataasuvut iluanaarummik aningaasarsitissavavut, naammagisimaarutigalugulu oqaatigisinnaavarput ingerlatseqatigiiffiup aningaasarsiornikkut inissisimanera assorsuaq nukittoriarsimasoq, Árni Ellefsen oqarpoq.
2017-imi pissutsit ingerlanerat BankNordikip siulersuisuisa iluaraat, naatsorsuutigaallu appartitsinerit sioqqullugit ingerlatsinerup inernera 150-190 millionit koruuniussasut.
Inernerit pingaarnersiukkat
Aningaaseriviup pingaarnersiugai:
- Appartitsinerit sioqqullugit ingerlatsinerup inernera 179. mio. kr.-uvoq, tassunga sanilliullugu 2015-imi 214 mio. kr.-uvoq.
- Bankip 12 mio. kr.-nut appartitsinerit utertippai, tassunga sanilliullugu 2015-imi 20 mio. kr.-upput.
- 2015-imut sanilliullugu bankip taarsigassarsisitsinera 1,5 mia. kr.-nik appariarsimavoq. Tassunga pingaarnertut pissutaavoq 2016-imi Danmarkimi inuussutissarsiortunik taarsigassarsisitsinerup annertunersaata atorunnaarsinneqarnera.
- Bankip uninngatitai 2015-imut sanilliullugit 48 mio. kr.-nik appariarsimapput.
- Akiliisinnaassusaa 18,3 %-iuvoq, tassunga sanilliullugu 2015-imi 16,8 %-iuvoq.
- Bankip siulersuisuisa naatsorsuutigaat 2017-imi ingerlatsinerup inernera appartitsinerit sioqqullugit 190 mio. kr.-ussasoq.