timersorneq
Nunarput amerlanerusunik pikkorivissunik timersortartoqalissaaq
Elite Sport Greenland iliuusissatut pilersaarummik nutaamik piariigaqarpoq
Kalaallit Nunaat nunat tamalaat unammiuaarneranni angusarinnerusalissaaq.
Taamaattumik Elite Sport Greeland (ESG) pilersaarummik saqqummiussivoq, taanna 2020 tikillugu atuutissaaq.
- Kalaallit Nunaat sinnerlugu pikkorivissortutut amerlanerusut timersortalernissaat anguniarlugu Elite Sport Greenland (ESG) ineriartortitseqataasussamik pilersaarusiorpoq, peqatigiiffik tusagassiuutinut nalunaarummi allappoq.
Atuaruk: Ataatsimeersuarneq: Timersorneq qaffassarneqassaaq
Angusaqarluarusuttumik toqqammavik
Pilersaarut suliassarlu ingerlaqqittussaq Kalaallit Nunaanni timersortartut pikkorivissortut nukittorsarniarlugit siunertaavoq, suliassarli ESG-p kisimi kivissinnaannginnerarpaa.
- Angusaqarluarusuttumik toqqammaveqarutta timersuutini assigiinngitsuni piukkunnaatilinnik ineriartortitineq kattuffiillu assigiinngitsut suleqatiginerisigut siunissaq neriulluarnarpoq, Elite Sport Greenland oqariartuuteqarpoq.
2020-p tungaanut anguniagassat aajuku:
-
Piukkunnaatillit 50-it piareersarluakkamik timersornikkut ineriartortinneqarnerat.
-
ESG kattuffiullu suleqatigiinnerisigut kattuffiit sisamat aaqqissuussaasumik tapiissuteqarnermigut piukkunnaatilinnik siuariartortunik timersortartulik.
-
Kattuffiit tallimat, nunanut allanut unammisartunik aallartitallit, pilersaarusiaalluartumik timersortartunut piukkunnaatilinnut- pikkorivissortunullu suliaqarluartut.
Kattuffiit siulliullutik junip qaammataani pilersaarusiamik saqqummiiffigineqarput. Pilersaarusiaq siullermmeersumik Nuummi timersornermi ataatsimeersuarnermi ullumi pingasunngornermi aggustip 17-ianni Malik Hegelund Olsenimit tamanut saqqummiunneqassaaq.
Atuaruk: Elite Sport Greenlandip piumasani sukappai