Psykiateri qaratsamigut ajoqusersimasoq
Nunarput akuersissutinik arsaarinnittoqartillugu ilisimatinneqarneq ajorpoq
Danskit peqqinnissaqarfimmi sulisut ukiuni kingullerni qulini sulisinnaanerminnut akuersissumminnik arsaarneqarsimasut qassiunersut IA-mit paaserusunneqarpoq
Sermitsiaq.AG-mi marlunngornermi allaaserisatsitut psykiateri qaratsamigut ajoqusersimasoq, danskillu tusagassiuutaanni piffissami sivitsortumi sammineqartoq, nunatsinni aamma sulisimavoq.
Psykiateri qaratsamigut ajoqusersimasoq Dronning Ingridip Napparsimavissuani tarnikkut nappaatilinnut immikkoortortaqarfimmi taartaalluni katillugit sapaatip akunnerini qulingiluani 2005-imiit 2006-imut sulisimavoq.
Tamatumalu kingorna saqqummerpoq Danmarkimi peqqinnissamut oqartussat nunatsinni peqqissaqarfimmut ilisimatitsineq ajortut, danskit peqqinnissaqarfimmi sulisut sulisinnaanerminnut akuersissutaatiminnik annaasaqaraangata. Akerlianik danskit peqqinnissamut oqartussai, nunani avannarlerni isumaqatigiissutineqarsimasut naapertorlugit, nunanut avannarlernut ilisimatitsisarpoq peqqinnissaqarfimmi sulisoq sulinissaminut akuersissutaatiminik annikillisaavigineqaraangat imaluunniit annaasaqaraangat.
Atuaruk: Psykiateri qaratsamigut ajoqusersimasoq IA-mit isumakulunnartinneqarpoq
Maanna Inuit Ataqatigiit folketingimi ilaasortaatitaat, Johan Lund Olsen, danskit peqqissutsimut ministerianut, Socialdemokraatineersumut Nick Hækkerupimut apeqquteqarpoq.
Johan Lund Olsenip siullermik paaserusuppaa sooq nunarput, Naalagaaffiup ataaniilluni, ilisimatitsinermi ilanngunneqartarsimannginnersoq peqqinnissaqarfimmi sulisut sulisinnaanermut akuersissutaatiminnik annaasaqaraangata imaluunniit annikillisaavigineqaraangata.
Tamatuma saniatigut aamma Johan Lund Olsenip ukiuni kingullerni qulini peqqinnissaqarfimmi sulisut qassit aamma sunik suliallit akuersissutaatiminnik piiaaffigineqarsimanersut imaluunniit annikillisaavigineqarsimanersut paaserusuppai, taakkunanngalu qassit nunatsinnut ilisimatitsissutigineqarsimannginnersut.
Naggasiutigalugulu Johan Lund Olsenip aamma tusarusupaa peqqissutsimut ministerip nunatsinni psykiaterimit qaratsamigut ajoqusersimasumit sullinneqarsimasut qanoq iliuuseqarfiginiarnerai.