Nunarput Aajap Løkkemut eqqaasitsissutigaa

Lars Løkke Rasmussenip (V) 2015-imi venstrep naalakkersuisui pilersikkamigit, naalakkersuisut tunngavissaat oqaloqatigiissutiginissaanut nunani avannarlernit ilaasortat qaaqquneqarput.

Issittoq aamma Kalaallit Nunaat tunngavimmi inissaqartinneqarnerannik tamanna kinguneqarpoq.

Apeqqarissaarneq
Folketingimi ippassaq ataatsimiittoqarnerani Aaja Chemnitz Larsenip (IA), ministeriuneq maanna naalakkersuisunik De Konservative aamma Liberal Alliance peqatigalugit pilersitsilermat taamaalioqqinnissaanik kajumissaarpaa.

- Naalakkersuisut tunngavissaanni nutaami akisussaaffiit 32-iusut, Danmarkip Kalaallit Nunaat sinnerlugu akisussaaffigisai ukkaneqaannarnissaat ministeriunermut eqqaasitsissutigaara, Aaja Chemnitz Larsen (IA) oqarpoq.

- Naalakkersuisut tunngavigisimasaanni IA arlalinnik ilungersuussaminik ilanngussaqarpoq, taakkulu tunngavissami qulakkeerusuppagut.

Aningaasat agguaassaneersut
Assigiinngitsullu anguneqareersimaneri naammagisimaarnerarpai. Folketingip oqaluttarfianit ingammik kalaallinut atugarliortunut aningaasaliissutigineqartut ingammik taakkartorpai.

- Naalakkersuisut pilersinneqarnerannit angusaqartoqarpoq, kisianni suli suliassaqaqaaq, taanna oqarpoq.

- Naalakkersuisut tunngavianni Kalaallit Nunaannut ukkassineq erserissoq, siunissami politikkikkut sulinissamut suli pingaartuuvoq, ilanngullugu oqarpoq.

Danmarkimi naalakkersuisut sapaatip-akunnerata ingerlanerani inissinnissaat naatsorsuutigineqarpoq.