Pituffik
Nunaqavissut Pituffimmi suliffissaqartinneqarnissaat arlalinnit qulakkeerniarneqarpoq
Kalaallit nunaqavissut Pituffimmi suliffissaqarnissaata qulakkeerneqarnissaat Folketingimi partiit arlallit isumaqatigiissutigiissutigaat
Nunaqavissut Pituffimmi siunissami sulisarnissaat qulakkeerneqartariaqartoq Folketingimi partiinit amerlanerusunit isumaqatigiissutigineqarpoq. Tassani aamma akileraarnikkut isertitarineqartartut attatiinnarneqarnissaat siunnerfigineqarpoq
Dansk Folkeparti minillugu partiit tamarmik isumaqatigiissuteqarput Pituffik pillugu pingasunngornermi oqallinnermi.
Inuit Ataqatigiit tunuliaqutaralugit Folketingimi ilaasortap Johan Lund Olsenip siunnersuutigaa Kalaallit Nunaata akileraarnikkut isertittagaat siunissami attatiinnarneqarnissaat.
Amerikarmiut suliffeqarfiat Exelis Services Danmarkimi piginneqatigiiffiusumik suliffeqarfia Vectrus Pituffimmi kiffartuussinissamik isumaqatigiissuteqareersoq ukioq kingulleq novembarimi.
Exelis Services kiffartuussinissamik isumaqatigiissuteqarfigineqarpoq naak Danmarki USA-lu isumaqatigiissuteqarnikuugaluartut danskit kalaallillu suliffeqarfii kisimik kiffartuussinissamik isumaqatigiissuteqarfigineqarsinnaagaluartut.
Taamatummi suleriaaseqarnikkut Kalaallit Nunaanni akileraarnikkut isertitarineqartut iluaqutigineqartaraluarmata.
Siunissamimi imaassinnaavoq amerikarmiut suliffeqarfiat amerikami akikinnerusumik sulisussarsiortut, taamaasillunilu Pituffimmi kalaallit danskillu sulisorineqartut suliffissaarutsinneqarsinnaassallutik.
Pituffimmi kiffartuussinissamik isumaqatigiissuteqarfigineqartoq danskit kalaallilluunniit suliffeqarfiusartuussasoq Johan Lund Olsenimit danskit naalakkersuisuinut piumasaqaateqarpoq.
Aamma kalaallit amerlanerpaartaat sulisassasut ilinniagaqartullu piumasarineqarpoq, tassuunatigummi akileraarutit Kalaallit Nunaannut tuttarnissaat qulakkeerneqartassammat.
Pituffimmi kiffartuussinissamut isumaqatigiissutip piumasaqaataat erseqqissumik inissisimasalernissaat aamma piumasaqaatigineqarpoq.
Dansk Folkeparti partiini kisiartaalluni suli isumminngilaq.
DF-imiimmi siunnersuutigineqarpoq danskit naalakkersuisuisa misissortalissagaat kikkut kiffartuussinissamut isumaqatigiissummut qinnuteqartuunersut.
Amerikarmiut suliffeqarfit kiffartuussinissamik isumaqatigiissuteqarfigineqarput 2013-mi.
Inuit Ataqatigiinnit siunnersuutigineqartoq isumaqatigalugu taasisinnaanertik suli ammaffigalugu Dansk Folkepartip Kalaallit Nunaat pillugu oqaaseqartartuata Søren Espersenip oqaatigaa.
Siunnersuut sisamanngorpat taasissutigineqassaaq.