Nunaqarfiup Narsaq Kujalliup aqqa allanngorpoq

Nunatsinni nunaqarfiit kujasinnerpaap pisortatigoortumik aqqa allanngortoq Oqaasileriffik ilisimatitsivoq

Narsaq Kujalleq pisortatigoortumik aqqa allanngorpoq.

- Nunat Aqqinik Aalajangiisartunut ilaasortat ataatsimiinnerminni saaffiginnissut misissuiffigingaatsiareerlugu isumaqatigiissutigivaat nunaqarfik pisortatigoortumik inuisa taaguinerattut ateqalissasoq Narsarmijit, Oqaasileriffik tusagassiutinut nalunaarummi allappoq.

Narsaq Kujallermik pisortatigoortumik ateqalernikuusimanerata oqaluttuassartarivaa qangarsuaaniilli nuna taanna Narsamik ateqartinneqarsimanera.

- Kujataanilu inoqarfiit marluk Narsamik ateqarnerisa kingunerisaanik atorfilittat avataaniit inoqarfiit taakku marluk immikkoortinniarlugit Narsaq Kujallermik taasalersimavaat, ilaatigullu Narsaq Avannarlermik massakkut illoqarfiusoq Narsaq allaffissornikkut taaneqartarnikuusimalluni, ilisimatitsissutigineqarpoq.

Nunaqarfiup pineqartup qanoq allanneqartarnissaa pillugu Nunat Aqqinik Aalajangiisartut Oqaasiliortunut naliligassanngorlugu saaffiginnissutigereerlugu, nunaqarfiup taamatut Narsarmijinik allanneqartarnissaa pillugu Oqaasiliortut ajoriffissaqartinnagu akueralugu aalajangiipput.

Powered by Labrador CMS