Nunaqarfinni marlunni qaleralinnik tunisassiorneq ingerlalluartorujussuaq

Actic Fish Greenland A/S-ip Kullorsuarmi Nuussuarmilu tunitsivii sulisussaaleqingaarnatik tunisassiorsuaarput.

Kullorsuarmi tunitsivik ulluni makkunani containerinik sisamanik qerititsivilerneqartussanngortoq

Tuniasassiorneq ima ingerlalluartigaaq allaat containerinik qerititsivilersuineq malinnaarpiarsinnaani. Royal Greenland nittartakkamini taama allaaserisaqarpoq.

Kullorsuarmi tunisassiorfik ulluni makkunani containerinik sisamanik qerititsivilerneqartussanngortoq, suliffeqarfissuaq ilisimatitsivoq.

Tunitsivik piginneqatigiilluni ingerlatseqatigiiffimmit Arctic Fish Greenlandimit siorna ingerlanneqalerpoq, Royal Greenland tassani 70 procentinik piginneqataassuteqarpoq.

Nunatassaqarpianngitsut

- Tunitsivik containerinik qerititsivinnik qulinik ukioq manna pilerneqarpoq. Tunisassiorneq ingerlalluangaarmat taakkuninnga qulinik pilerneqarneq soorlu malugisimanagu. Taamaammat sisamanik tapertassaannik maanna ilaqqippagut. Uanga nammineq aalajangiisinnaasuuguma ilaqqikkusussinnaagaluarpakka, kisianni aamma nunaminertatut periarfissaasinnaasoq amigalerami, taamaammat susinnaanerluta takujumaarparput, Frederik Olsen Kullorsuarmi Nuussuarmilu tunitsivinni ulluinnarni aqutsisuusoq Royal Greenland naapertorlugu oqarpoq.

- Ukioq aalisartut pissaannik qamuteralannik katillugit 18-inik Nuussuarmut Kullorsuarmullu pilersuivugut, tamatumalu kingorna aalisartut qaleralippassuarnik tulaassuiuarsinnarput, tunisassiornerlu marloriaatinngorluni. Taamalu qaammatit tallimat ingerlaneranni Kullorsuarmi Nuussuarmilu 700 tonsit qeritippagut, taanna oqarpoq.

Sulisussaaleqinngillat

Arctic Fish Greenland A/S-imi 2017-imi juulip aqqaneq-aappaani pilersinneqartumi najukkani aalisartut 96-it aammalu sulisut qulit piginneqataasuupput.

Naallu ingerlatseqatigiiffik Nuussuarmi canadamiut umiarsuaannit tunitsivimmit ulloq unnuarlu 14-it missaannik sulisulimmit unammillerteqaraluartoq sulisussaaleqisoqanngilaq.

- Kullorsuarmi ukiuunerani aasaaneranilu sumilluunniit ajornartorsiuteqarfiunngitsumik sulisussaaleqiffiunngitsumillu ingerlalluarujussuartoqarpoq, naallu Nuussuarmi aasaanerani unnukkorsiortussanik amigaateqarsinnaasaraluarluta tunisassiorneq aamma ingerlalluaqaaq. Sulisut tamarmik taakkunani sumiiffinneersuupput avataaniillu tikisitanik ilaqaratik, Frederik Olsen oqarpoq.

Nuussuarmi Kullorsuarmilu tunitsiviit tamarmik immikkut qulit missaannik sulisoqarput.

Tulaassuinermut pilersaarusiorneq

Tulaassuineq piffissap ilaani ima ulapaarfiutigilersimatigaaq allaat piginneqataasut isumasioqatigereerlutik tulaassuinermi pilersaarusiamik atuutsitsilertariaqarsimallutik.

- Eqimattat aalisartunik 20-nik inuttallit ataasinngornermi tulaassuisarput, eqimattat allat marlunngornermi tulaassuisarput ilaalu ilanngullugit. Tulaassuinermi pilersaarut pitsaasorujussuuvoq, imalu iluarineqartigaaq allaat ukiumut atorneqarnissaa aalajangiunneqarluni, Frederik Olsen unnersiorpoq.

Taassuma tulaassuinermut pilersaaruteqartitsineq allanut angummaffiusanngitsunut innersuukkusuppaa.

Powered by Labrador CMS