Qanimut oqartussaaqataaneq
Nunaqarfimmiut Nuummut ataatsimiigiassapput
Nunaqarfinni aqutsisut siulittaasuisa borgmesteri ataatsimeeqatigissavaat marlunngorpallu kommunalbestyrelsip ataatsimiinnerani peqataassallutik
Kommuneqarfik Sermersuumi Nunaqarfinni aqutsisut Nuummi septembarip 24-aniit 26-anut ukiumoortumik ataatsimiissapput. Taamatut Kommuneqarfik Sermersooq tusagassiorfinnut nalunaarutikkut paasissutissiivoq.
Taanna pitinnagu aqutsisut siulittaasuisa borgmesteri Asii C. Narup qaammatit pingasut allortarlugit pisartumik ataatsimeeqatigissavaat. Aqutsisut siulittaasui kommunalbestyrelsip ataatsimiinneranni aamma missingersuusiat pillugit isumasuiqatigiinnermi septembarip 22-aniit 24-anut pisussani peqataassapput.
Nunaqarfinni aqutsisut septembarip 24-aniit 26-anut isumasioqatigiinneranni makku sammineqassapput:
1. Aaqqissugaaneq sammillugu. Siorna isumasioqatigiinnermi kommunalbestyrelse aamma nunaqarfinni aqutsisut isumaqatigiissusiaat nanginneqassaaq itisilerneqassallunilu. Nunaqarfinnut aningaasaliissutaasartut, suliniutit killiffii, nalimmassaanerit tulleriissaarinerillu sammineqassapputtaaq.
2. Nunaqarfinni inuunerup pitsaassusia sammillugu. Inunneq isumaginninneq, nalimmassaanerit, pinaveersaartitsinerit, najukkami inerisaanerit, meeqqat pisinnaatitaaffii, atuarfiit meeqqeriviillu oqaluuserineqassapput.
Arktisk Kommando tallimanngornermi pulaarneqarsinnaassaaq.
Borgmesteri Asii C. Narup isumasioqatigiinnissamut qilanaarpoq, siornalu ataatsimiinnertut pissarsiffiulluartigisumik ataatsimeeqqinnissaq orniginartillugu. Taamanimi nunaqarfinni aqutsisut arlallit illugiilluni oqaloqatigiinneq iluarisimaarlugu oqaatigaat, taamatullu kommunimi najukkat imminnut ungasikkaluaqisut kommunimi ataatsimooriartulerneq malunnarluartoq erseqqissiartornerarpaat, tusagassiorfinnut nalunaarummi allassimavoq.