Arctic Winter Games

Nunaqarfimmiut bordtennisimi naapipput

Nunaqarfimmi Niaqornaarsunni meeraanerminnit ikinngutigiit Arctic Winter Gamesimi bordtennisimi finalimi unammipput

Inngili Petersen Melissa Larsenilu finalimi unamminermik kingorna

Nivissat ikinngutigiit Inngili Petersen Melissa Larsenilu nunaqarfeeqqami peroriartoqatigiissimapput maannalu imminnut 4.000 kilometerinik ungasitsigalutik najugaqarlutik.

Bordtennissertartut inuusuttut finalimi unammigamik naligiittorujussuupput, Finalimi unammipput iligiiaarluni finalimi kuultinnaqqammerlutillu.

Aallarteqatigiissimapput

– Taama qanitsigaluni imminut unammilluni pikkunakujoqaaq, sapinngisarpulli tamaat ikinngutigiilluartutut tamaviaarpugut pissanganaqaarlu, Melissa Larsen kuultinnanniulluni unamminerup kingorna Sermitsiaq.AG-mut oqarpoq.

Nivissat ikinngutigiit Niaqornaarsummiut ataatsikkungajak bordtennisertalersimapput.

Inngili Petersen siulliulluni 2009-mi, Melissa Larsenilu 2010-p aallartinnerani bordtennisertalersimapput.

Ilimaginngisamik naapittut

Ullumikkut imminnut 4.000 kilometerinik ungasitsigalutik najugaqarput. Melissa Aasianni GU-mi aallarteqqammerpoq, Inngililu bordtennisernermik piukkunnaatillit allat peqatigalugit Hjørringimi Halvorskov Efterskolimi atuarluni.

Naatsorsuutigisimavisiuk qaqugukkulluunniit Arctic Winter Gamesimi finalimi imminut unammissallusi?

– Tamanna eqqarsaatiginngisaannarsimavarput, Melissa Larsen oqarpoq.

Unamminerminni tamani ajugaasarput

– Ingerlalluarsimaqaagulli, aaqqissuussamilu AWG-tut ittumi peqataaneq nuannareqaarput.

Inngili Petersen Melissa Larsenilu kisimiilluni iligiiaarlunilu unamminerminni tamani ajugaasarsimapput.

Powered by Labrador CMS