Aalisarneq

Nunaqarfimmiu: Uagut aamma siunissaqarpugut

Kommunalpoliteri Apollo Mathiassen nunaqarfimmi Saattuninngaanneersup, Nunatsinni aalisarnermik siuarsaanerup siammarterneqarnissaa neriuutigaa.

Kommunalpoliteri Apollo Mathiassen nunaqarfimmi Saattuninngaanneersup, Nunatsinni aalisarnermik siuarsaanerup siammarterneqarnissaa neriuutigaa.

Naalakkersuisut isumaqatigiissutaanni taakkartorneqarnikuuvoq inuiaqatigiinni siammasissumik ineriartornissaq. Qaquguliuna Naalakkersuisut siammasissumik ineriartortitsineq aallartinniaraat?

Qaasuitsoq Avannalermi kommunalbestyrelsimut ilaasoq, Apollo Mathiassen, tusagassiuutinut nalunaarummi taama aperivoq.

Taassuma paasisinnaanngilaa, Nunatsinni nunaqarfiit sooq ineriartortinneqarnissaannik pilersaarusiorneqarsimannginnersut.

- Nunaqarfinni piorsaavigineqarnissaannik pilersaaruteqartoqannginnera pissutingalugu nunaqarfinni innuttaasut ikiliartuinnarput. Ineriartortitassanik arlalinnik peqareeraluartoq atorluarneqanngillat. Periarfissat atorluarutsigit, siunissarput qaamassaaq, taanna erseqqissaavoq.

Aalisarnermi killilersuinerit

Nunaqarfinni innuttaasut illoqarfinnut nussornerat, Apollo Mathiassenip tupigusuutigaa.

- Taakkua illoqarfinni bloktilskudi inuussutigaat. Uagut Saattuni nammineersinnaangaluarpugut, taamaattoq killilersuinersuupput ineriartornissarput akimmisaartittarpaa. Aalisarneq inuussutissarsiutini pingaarnersaavoq, taamaattoq piffimmi ineriartorneq akimmisaartinneqartuarluni. Nunatta karsia nunaqarfinnit aalisakkanik tulaassorneqartunit isaatitsilluarsinnaangaluarpoq, taamaaliorusuttoqanngilarli, taanna tikkuaavoq.

Periarfissat atorluarneqarlik

Apollo Mathiassenip paasisinnaanngilaa, ineriartortinneqarnissamut periarfissat atorluarneqannginnerat.

- Kikkunuku tusarniaavigineqartartut Nunatta ineriartortinneqarnissaa pillugu? Nunatsinnut nunasinikut, nunaqarsimanngisaannartulli tusarnaartarpagut. Nunatta ineriartortinneqarnissaanut siunnersuissappata, naalakkersuisoqatigiinnissamut isumaqatigiissut takutissuarput, tassanngaannilli siunnersuillutik aallartissinnaapput, Apollo Mathiassen naqissusiivoq.

Taamaammat taanna kaammattuivoq, inuiaqatigiit ineriartortinneqarnissaanik nutaamik eqqarsartoqartariaqartoq.

- Ullumikkutut ingerlaannassagutta, nunaqarfinni illoqarfinnilu minnerusuni innuttaasut amerlanersaat illoqarfinnut anginernut nuussapput. Ineriartortinneqarsinnaasunik atorluarsinnaasatsinnik periarfissaqarluarpugut, uagulli kisitta ineriartornermik mumisitsisinnaavugut, Apollo Mathiassen oqarpoq.

Powered by Labrador CMS