Nunaqarfimmi suleqatigiilluarnikkut pisarpassuit annaanneqarput
Upernavik Kujallermi innuttaasut suliniuteqarluarnerisigut umiarsuaq assartuut Pajuttaat qaleralinnik usilersorneqarpoq
Umiarsuaq nunaqarfinnut assartuut Pajuttaat piinsimi Upernavik Kujallermiippoq - Upernaviup pigisaani nunaqarfiit kujallersaanni.
Nunaqarfiup qerititsivia qaleralinnik ulikkaavissimavoq, taamaattumik umiarsuup tikinnera nunaqarfimmiut nuannaarutigaat.
Ajoraluartumik nunaqarfimmut aqqutaa kingulleq sikuusimavoq inguneqarlunilu, taamaattumik umiarsuaq nunaqarfimmit kilometerit marluk missaannit avasitsigaluni uniinnartariaqarpoq, RAL Sermitsiaq.AG-mut oqaluttuarpoq.
Pallit aalisakkanik imallit umiarsuup sinaaliaanneqarput. Aallaqqaammut snescooterit marluk atorlugit kingornalu qimussit tallimat snescooterillu marluk atorlugit.
Pallit katillugit 190-it umiarsualiaanneqarput, maannalu nunaqarfimmiut tuniseqqissinnaanngorput.
Pajuttaat Aasiannut utereerpoq, tassanilu qalerallit usingiarneqarput.