Aalisarneq
Nunaqarfimmi qerititsiveqannginneq inuussutissarsiornikkut ineriartortitsinissamut killiliisoq
Royal Greenlandip Akunnaami tunitsiviutaani qerititsiveqannginnera inuussutissarsiornerup ineriartunnginneranik kinguneqarpoq. Aalisartut piniartullu peqatigiiffiat piaartumik iliuuseqaqqusigaluartut Royal Greenlandimit itigartinneqarput
Akunnaap eqqaani aalisagarpassuaqarpoq. Taamaattumik Royal Greenlandip Akunnaami aalisakkanut tunitsiviutaa siorna decembarimi saarullippassuarnik tigooraavoq.
Tunineqartut tamarmik tisaartorneqarlutik panertiterneqarput. Sikujartorneranili aalisarneq uninngasimagaluartoq, maanna sikummat aalisartut sikukkut qassusersorlutik ningittagarsorlutillu saarullinniaqqilerput. Saarulliit tuniorarneqartut tarajorterneqarput. Royal Greenlandip naatsorsuutigaa saarullinnik tunisineq ukiup sinnerani ingerlanneqassasoq.
Aalisakkanilli tunisineq tunisassiornerlu piffissami aggersumi killilimmik ingerlanneqassaaq, tunitsiviup qerititsiveqannginnera pissutaalluni.
Peter Nielsen, Akunnaami Royal Greenlandip tunitsiviutaani pisortaq, oqarpoq, qerititsiveqannginermik ajornartorsiut ukiuni arlalinngortuni ajornartorsiutaasoq, ilaatigut qerititsivimmut inissaalatitsineq pissutaalluni.
Allaaserineqartoq tamaat Tamanut Avannaanimi atuarneqarsinnaavoq. Qaasuitsup Kommuniani pisartut assigiinngitsut pillugit allanik aamma aviisimi atuartoqarsinnaavoq. Aviisi akeqanngitsumik ataani aajuk: