innuttaasunik ataatsimiititsineq
Nunaqarfimmi innuttaasut imigassartorpallaarneq aningaasanoorajunnerlu qaangerusukkaat
Tunumiumik katsorsaasoqarnissaq, aanngajaarniutinik paasititsiniaaneq ilaqutariinnillu katsorsaasarneq Kuummiuni innuttaasunit kissaatigineqarput.
Peqqissutsimut naalakkersuisoq Agathe Fontain (IA) aamma ilinniartitaanermut, kultureqarnermut, ilisimatusarnermut ilageeqarnermullu naalakkersuisoq Doris Jakobsen (S) Kuummiuni innuttaasunik ataatsimiisitsipput
Ataatsimiinnermi imigassaq, ilinniarneq inuussutissarsiornerlu sammineqarput.
- Imigassaq pillugu innuttaasut isumaqarput imigassartorpallaarneq aningaasanoorajunnerlu qaangerneqartariaqartut, siunnersuutigineqarportaaq silami imerneq inerteqqutaalissasoq, Namminersorlutik Oqartussat tusagassiuutinut nalunaarummi allapput.
Katsorsartinnermut periarfissaqarusuttut
Meeqqat siornaakkunni akerliussutsimik takutitsinerat imigassartorpallaarnermut iluaqutaasimagaluarpoq.
- Meeqqavut aatsaat ajunngitsumik siunissaqarput imernerput allanngortikkutsigu kivitseqatigiillutalu periuseqarutta, innuttaasunik ataatsimiititsinermi oqariartuutit ilagaat.
Tunumiumik katsorsaasoqarnissaq, aanngajaarniutinik paasititsiniaaneq ilaqutariinnillu katsorsaasarneq Kuummiormiunit kissaatigineqarput.
Utaqqisinnaajunnaartut
Ilinniartitaaneq pillugu innuttaasut isumaqarput: Nunaqarfimmi atuartut angusaat qaffassappata ilinniartitsisutut ilinniarsimasut ataavartullu pigineqalertariaqartut, timelærerinut pikkorissaanerit pisariaqartut, praktikkerfissaaleqinerup ajornartorsiutaanera iluarsiivigineqartariaqartoq, nunaqarfimmiut meerartaat kollegiartut anisinneqartarnerat iliuuseqarfigineqartariaqartoq minnerunngitsumillu sunngiffimmi sammisassaqarneq siuarsartariaqartoq.
- Utaqqiinnarata nammineq iliuuseqartariaqarpugut, innuttaasut ataatsimiinneranni naggasiutigineqartut ilagaat.
Nunaqarfinni aqutsisut Naalakkersuisunut oqariartuuteqarput Sermiligaamiit Kuummiunut qaleralinnik assartuineq isumannaannerusumik ingerlanneqartariaqartoq, soorlu angallammik anginerusumik assartuilernikkut tassuunattaaq anguneqarsinnaammat Kuummiuni tunisaqarnerulernissaq, Namminersorlutik Oqartussat taama ilisimatitsipput.