Wednesday, January 10, 2018 - 15:30

Nunaqarfimmi ilinniartitsisoq kamattoq: Sivisuumik qulimiguulimmik tikinneqanngilagut

Decembarip 21-annili qulimiguulimmik angallassisoqarsimanngilaq, Kullorsuarmi innuttaasoq oqarpoq.
Assi.: Carl Schou
Nunaqarfimmi Kullorsuami qulimiguullip kinguaattoorneranut inuit amerlasuut eqqugaapput, nunaqarfimmi ilinniartitsisoq oqaluttuarpoq

- Juullikkunni sulinngiffeqarnermi angalasunik suleqateqarpunga Upernavimmiik Kullorsualiarniarlutik utaqqisunik. Decembarip 21-annili nunaqarfik qulimiguulimmik tikinneqanngilaq.

Viggo Andersen Kullorsuarmi ilinniartitsisoq Sermitsiaq.AG-mut taama oqaluttuarpoq, nunaqarfik Upernavimmit avannamut 300 kilometerit missaani ungasissusilimmiippoq.

Atuarfik suliffimmik misiliisumik atorfeqartitsisussaagaluartoq, Viggo Andersen ilisimatitsivoq, kisianni taanna Danmarkimut uterniarluni aalajangersimavoq, Kullorsualiarnissap ajornarnera pissutigalugu.

- Qulimiguullip nunaqarfimmut tikinnissaa pisariaqartipparput. Nalinginnaasumimmi sapaatip-akunneranut marloriarluni tikittoqartaraluarpoq, arlaqartut maani nunaqarfimmit ilinniarfimminnut aallartussaapput, uagullu ilinniartitsisunik suliartortussanik amigaateqarpugut, taanna erseqqissaavoq.

Ajornartorsiut aaqqiivigineqartoq
Kullorsuarmi ajutoortoqassagaluarpat susoqassanersoq Viggo Andersen ernumassuteqarpoq.

- Arlaat nakorsamik ikiorneqartariaqassappat sivisuumik utaqqisoqarsinnaanngilaq. Ukiup imaalinerani teknikkikkut ajoquteqartoqartuaannarpoq, Air Greenlandip ajornartorsiutit iluarsingajalissagai neriuppunga. Piffissami taama sivisutigisumi qulimiguulimmik angallassisoqannginnera uagutsinnut attanneqarsinnaanngilaq, Viggo Andersen oqarpoq.

Ajornartorsiutit decembarimi silarlunneranik aamma januaarimi qulimiguullip teknikkikkut ajoquteqarneranik pissuteqartut, Air Greenlandip pingasunngornermi Sermitsiaq.AG-mut ilisimatitsissutigaa. Kisianni ullumi pingasunngornermit sapaatip-akunnerata naanissaata tungaanut qulimiguulimmik angallassisoqarniarpoq.

Seneste nyheder / Nutaarsiassat kingulliit