innuttaasunik ataatsimiititsineq
Nunaqarfimmi hashi qatsunneqarpoq
Peqqissutsimut Naalakkersuisoq Agathe Fontain (IA) Qeqertarmut tikeraarsimavoq, innuttaasunillu ataatsimiititsilluni
Qeqertami, Ilulissaniit 90 kilometerinit ungasitsigisumiittumi, innuttaasut nunaqarfimminni hashi pillugu naammatsipput. Taamaattumik Peqqissutsimut Naalakkersuisoq Agathe Fontain-imut (IA) allagaqaateqarput
- Qeqertami innuttaasut allagaqaataat attortissutigeqaara. Aatsaat siullerpaamik taamatut saaffiginnissummik tigusaqarpunga, tassani innuttaasut ataatsimoorlutik ikiaroornartup haship ajornartorsiutaanera annertooq qanoq iliuuseqarfigerusullugu allagaqarmata. Taamatut iliuuseqarusunneq nersortariaqarpoq nukissaqarnermillu angisuumik takutitsineruvoq. Taamaattumillu Qeqertamukarniarlunga aalajangerpunga tapersersuinera ikiuukkusunneralu takutinniarlugu, Peqqissutsimut Naalakkersuisoq, Agathe Fontain tusagassiuutinut nalunaarummi oqarpoq.
Qeqertami innuttaasunik ataatsimiisitsinermi Agathe Fontain Ilulissani politiit peqatigalugit tikippoq. Innuttaasunik ataatsimiisitsinermut aggiasoqarluarpoq tassami nunaqarfinni innuttaasunit 110-iusunit 42-t peqataammata, Namminersorlutik Oqartussat paasissutissiipput.
Innuttaasut ataatsimoortariaqartut
Ataatsimiinnermi Agathe Fontain Namminersorlutik Oqartussani hashi akiorniarlugu qanoq suliaqarnerlutik oqaluttuaraa, ilaatigut hashi akiorniarlugu nuna tamakkerlugu iliuusissatut pilersaarut eqqaaneqarluni kiisalu Allorfimmi innuttaasunut tamanut, pinngitsuuisinnaajunnaarnerminnik ikiortikkusuttunik, akeqanngitsumik katsorsaasalersimaneq eqqartorneqarluni.
- Ataatsimoorluta inuiaqatigiinni hashimik atuilernissamut pitsaaliuisariaqarpugut, tamattalu tapersiinissatsinnut periarfissaqarpugut. Meerartavut mikisuuneraniit toqqissisimanermik pitsaasunik peqqinnartunillu ileqqoqalersikkutsigit, meeqqavut annertunerusumik peqqinnartumik inooriaaseqalernissaannik periarfississavagut taamalillutik inersimasunngorunik hashimik aanngajaarniutinillu allanik atuilernissamut akiuisinnaanngortillugit, taanna innuttaasunik ataatsimiititsinermi ilaatigut oqarpoq.
Siunissamut ernumassuteqarneq
Innuttaasut pitsaaliuinissamut hashimullu ajornartorsiuteqarnermut tunngassuteqartunut sakkussaasinnaasunik ikiorneqarnissaminnillu ujartuipput. Oqaluttuarput nunaqarfimminni hashimik tuniniaaneq tamanut saqqumiinnartoq, piffissallu ingerlanerani piunera nipaatsumik akuersaaginnarneqarsimasoq.
- Hashi pillugu qanoq unnerluutiginnissinnaanerluni taamaaliorniaraannilu uppernarsaateqarnissaq soqutigineqarluarpoq. Politiinit oqariartuut pingaaruteqarluinnartoq tassaavoq hashimik tuniniaasoqartillugu politiinut nalunaarutigineqarnissaq pingaaruteqartoq, taamaalilluni politiit nalunaaruteqarneq qisuariarfigisinnaammassuk, Namminersorlutik Oqartussat allapput.
Innuttaasut arlallit nunaqarfitsik nuannersoq uummaarikkaluartorlu maannakkut unittuusilernera ernummatigalugu oqariartuutigaat
Namminersorlutit Oqartussat paasissutissiaraat, Qaasuitsup Kommuniani pitsaaliuinermut siunnersortit nalunaartut Qeqertaq piffissami aggersumi tikeraarfigineqarumaartoq.