Kapisillit

Nunaqarfimmi eqqakkanik ikuallaavik atorunnaarpoq

Kommuneqarfik Sermersuup Sanarfinermut Avatangiisinullu immikkoortortaqarfiata Kapisilinni eqqakkanik ikuallaavik atorunnaarsinniarlugu aalajangerpoq

Kapisilinni eqqakkanik ikuallaavik maanna matuneqareerpoq

Kapisilinni nunaqarfimmi illoqarfiit pingaarnersaannit 50 kilometerit missaani ungasissulimmiittumi, eqqakkanik ikuallaavik piffissami sivisuumi iluamik ikuallaasinnaasimanngilaq.

Taamaattumik Kommuneqarfik Sermersuumi Sanarfinermut Avatangiisinullu immikkoortortaqarfiup ikuallaavik marsip aallartilaarnerani matuniarlugu aalajangerpaa.

- Motoori ikummarissaasartoq ajoquteqalersimalluni maanna atorunnaarsinneqartariaqalersimavoq. Kisianni atorunnaarsitsinerup kingunerissanngilaa, Kapisilinni innuttaasut nunaannarmut eqqaasalernissaat, Kommuneqarfik Sermersuumi Sanarfinermut Avatangiisinullu ataqatigiissaarisaoq, Ivan Falk Petersen oqarpoq.

Atuaruk: Suliffeqarfiit amerlasuut pinngortitaq eqqaavittut atorpaat

Eqqakkanik immikkoortitsineq
Tamanna ilaatigut pissutigalugu Kapisilimmiut eqqakkaminnik maanna immikkoortunut pingasunut immikkoortiterisalissapput, soorlu Kommuneqarfik Sermersuup tamanna anguniagarigaa aammattaaq anguniagaralugu atoqqinneqarsinnaasut atorluarneqalersinnaaneri taamatullu eqqannik annikillisaanissaq siunertarineqarluni.

Eqqakkat immikkoortinneqartussat pingasut tassaapput savimerngit, igalaamerngit allallu ikuallanneqarsinnaasut, kommuni allappoq. Tamanna anguniarlugu Kapisilinni angerlarsimaffiit tamarmik eqqaavissanik assigiinngitsunik pingasunik qalipaatilinni tunineqartalissapput.

Eqqagaallu taakku kommunip sulisuinit assartorneqartassapput, taamaalioreernermi eqqakkat assigiinngitsut immikkoortiterneqarlutik poortorneqartassapput, Nuummullu umiarsuarmik assartorneqartassallutik.

Atuaruk: Sermersuup eqqakkanik immikkoortiterineq aallartippaa

Eqqakkat illoqarfimmut assartorneqartassapput
Kapisilinni innuttaasut qaqugorpiaq eqqakkaminnik immikkoortiterisalissanersut suli iluamik ullulerneqanngilaq, Ivan Falk Petersenilli ilimagaa tamanna piaarnerpaamik pisalerumaartoq tassa upernaap maanna ingerlanerani aallartinneqarsinnaassasoq oqarluni.

Kapisilimmiut eqqagaat katillugit 400 kiilut sapaatip akunneri tamaasa Nuummut umiarsuarmik nassiunneqartarput.

Powered by Labrador CMS