Nunaqarfiit siunissaat oqallisigineqartoq

Kommuneqarfik Sermersuumi nunaqarfinni aqutsisut 18-it sapaammiit septembarip 25-aniit 28-ata tungaanut Tasiilami isumasioqatigiissinneqarput.

Taama isumasioqatigiinneq kommunerujussuit 2009-mi pilersinneqarmata sisamassaa isumasioqatigiissinneqarput, kommuni ilisimatitsivoq.

Oqaloqatigiinneq peqqissaartoq
- 2009-mi kommunerujussuit pilersinneqarmatali nunaqarfinni aqutsisut akuttunngitsumik naapisinneqartarnissaat kissaatigaara. Taama naapeqatigiinnermi pingaaruteqarpoq kommunalbestyrelsip nunaqarfinni aqutsisullu akornanni suleqatigiinnerup nukittorsarneqartarnissaa, taamaaliornermi nunaqarfinni aaqqiissutissanik ataatsimoorussinikkut immersoqatigiittarnissaq anguneqartassammat, Kommuneqarfik Sermersuup borgmesteria, Asii Chemnitz Narup, isumasioqatigiittunut tikilluaqqusinermini ilaatigut taama oqarpoq.

Ataqqinaammik pulaartuusoq
Kommuneqarfik Sermersuumi nunaqarfinni aqutsisut isumasioqatigiinnerannut peqataasoq, KANUNUPE-p siulittaasua, Jens Kristian Therkelsen ippassaq sapaammi ammaanermi oqalugiarpoq.

Nunatsinni nunaqarfinni aqutsisut kommunini tamani Kommuneqarfik Sermersuumisut akuttunngitsunik ataatsimiisinneqartartuuppata tamanna nuannaarutigissagaluarlugu oqarpoq.

- Kommunit ilaanni akuttuallaamik nunaqarfinni aqutsisut isumasioqatigiissinneqartanerisa ilaatigut kinguneraa, nunaqarfiit amerlavallaat illoqarfinnut naleqqiulluutik siuarsarneqartarneri kingaappallaamik ingerlanneqartarmat, tamannalu akueriuminaappoq, Jens Kristian Therkelsen oqarpoq.

Nunaqarfinnut aningaasaliissutit
Nunaqarfinni aqutsisut isumasioqatigiinnerisa ulluisa siulliannit siunnersuutigineqarpoq, nunaqarfinnut aningaasaliissutit inoqqortussiseq naapertorlugu siunissami aningaasaliisoqartarnissaa, tassani siunnersuuteqartuullutik Qeqertarsuatsiaarmiut Kapisilimmiullu.

Siunnersuutigineqartoq alla tassaavoq, nunaqarfinni eqqiaasarneq nunaqarfinnut aningaasaliissutinik aningaasalernagu tamanna Sanarfinermut Avatangiisinullu immikkoortortaqarfimmit aningaasalerneqartalernissaa.

Kommuneqarfik Sermersuumi nunaqarfimmi aqutsisut isumasioqatigiissinneqarnerat marlunngorpat septembarip 27-anni naammassineqassaaq.