Nunaqarfeeraq qaleralinnik annertuumik tunisassortoq

Qeqertami Qeqertarsuup Tunuaniittumi Royal Greenlandip tunisassiorfiani 15-inik sulisoqarpoq.

Tassanilu tunisassiorluartoqarpoq, tassami ullormut 8 tons angullugit tunisassiortoqartarpoq.

Qalerallit iluitsuutillugit amerlanerilli niaquerlugit paperuerlugillu tunisassiorfimmi tunisassiaraat, sikugaangalli saarullinnik annikitsunik aamma tunisassiortarput.

Ukioq tamaat tunisassiortarput
Ukiuni kingulliunerusuni tunisassiassat tunineqartartut annikinnerulernikuugaluartut taamaattoq sulisut 15-it qaammatini qulingiluani suliassaqartinneqartartut, tunisassiorfimmi pisortaq Jakob Broberg Royal Greenlandip nittartagaanut oqarpoq.

- Ukiuni kingullerni tunitsiviliisarnerit aammalu namminersortut tunitsiveqalernerat pissutigalugu allaneersut tunisisarnerat annikillinikuugaluartoq taamaattoq ukioq naallugu tunisassiortarpugut. Sikugaangat suliassakilligaangat qaammatini pingasuni sulisut ikilisarpavut.

Pitsaassusilerinermi nakkutilliineq
Qeqertami tunisassiorfik Kangaamiut Seafood A/S-imit ingerlanneqarnikuusoq 2014-imi Royal Greenland A/S-ip ingerlatarilerpaa. Tunisasssiorfik Royal Greenlandimit ingerlanneqalermat pappialarsorneq annertunerusoq ingerlanneqalersoq, Jakob Broberg oqarpoq.

- Tunisassiorfik Royal Greenlandimit ingerlanneqalermat tunisassianik pitsaassusilerinermi nakkutilliineq annertunerusoq ingerlanneqalerpoq. Avammut tunisassiorneq pissutigalugu pitsaassuseq qaffasissoq anguniarneqarmat pappiararsornerulernerput annertunerusumik ajoriffaqartinngilara. Pitsaassusilerinermi nakkutilliisoq peqatigalugu pappialarsorneq ingerlataraarput. Tunisassiorfiup Royal Greenlandimit ingerlanneqalernerata kingorna ajorseriaatinik tikkuagassaqanngilanga, taamaallaalli Royal Greenlandimi sulisunut pikkorissarnissamut neqeroorutit sulisutsinnut aamma neqeroorutigineqartarnissaat kissaatiginartippara, Jakob Broberg oqarpoq.

Nunaqarfik Qeqertaq Ilulissat avannarpassuaniittoq 113-inik inoqarpoq.