Nunaput Great Nordic Feastimut peqataasoq

Oktobarip naalernerani, nunani avannarlerni nalliuttorsiornermi nerisassiortarneq pillugu pisoqartitsinermi London's Southbank Centerimi kalaallit nerisassiaasa mamassusaat ersersinneqarpoq.

Inuit arfineq pingasut nunanit avannarlermeersuut ataatsimoorlutik nerisassat nunat seqernup kaaviinnarfianneersut – arsarnerit ukiullu takisuup najugaanneersut – kusanarnerpaat saqqummiuppaat.

Inunnut 400-nut
Kistannguaq Simonsen, Hotel Kangerlussuarmi pisortaq Visit Greenlandimiillu Idrissia Thestrup kalaallit nerisassaannik inunnut 150-it missaanniittunut tusagassiinermik suliaqartunut pingaarutilinnut sassaalliipput arfininngornermilu ulloq 21. oktober inunnut 400-t missaanniittunut sassaalliillutik.

Periarfissaq atortariaqartoq
Naak Kalaallit Nunaat nunanut allanut peqataasunut naleqqiullugu nunaarannguugaluartoq, Kalaallit Nunaata periarfissaq tiguaa taamaasillunilu unammillernartoq tigullugu. Tamanna imminut akilersinnaasoq takutinneqarpoq, inuit Kalaallit Nunaat pillugu pitsaasorujussuarmik qisuariarmata paasillugulu, Kalaallit Nunaat ornitassaasoq nerisassallu tungaatigut kulturikkut immikkuullarillunilu allat saqqummiisut assigalugit qaffasissorujussuarmik inissisimasoq.

Fia Gulliksson, Pisortaq, Suliniummik aqutsisoq aamma Great Nordic Feastimi Pisortaasoq oqarpoq:

- Aaqqissuussineq pulaartunut nunani avannarlerni nerisassanik assigiinngitsorpassuarnik ussiinissaannut periarfissaavoq kiisalu ornitassat pitsaanerpaat ukiuni tulliuttuni misigisaqarnissaannut paasisaqarfiginissaannut periarfissiisoq.

- Nunat avannarliit immikkuullarilluinnartuupput igaarisartakkattalu inooriaasittalu ilaat assigiipput. Nerisassaatigut nutaat, minguitsut naleqassutsimut, ammasuunermut, tatiginninnermut misiginneqatiginninnermullu tunngalluinnarput, taamaattumillu nunarsuarmi tamani immikkuullarilluinnartuutippaatigut tamannalu pilluarnitsinnut ilorrisimaarnitsinnullu ilaavoq.

Uummat ajugaassutigalugu
Naatsorsuutigineqartut qaffasissorujussuupput. Aatsaat siullermeerluni nunat avannarliit arfineq pingasut tamarmik ataatsimoorlutik pisumik taama angitigisumik nerisassanut angalanissamullu periarfissanik neqeroorutigisinnaasatsinnik aaqqissuussaqarput.

Kalaallit Nunaat sinnerlugu peqataaniarluni Kistannguaq Simonsen kalaallit nerisassaataat nutaajunerpaat atorlugit igariaatsit qaffasinnerpaat ikiorsiullugit immikkut ittumik sassaalliutiliorsimavoq. Qaleralik Kalaallit Nunaanneersoq knoldselleriip qaavanut ilillugu sanavaa, aserortikkamik qeqqualerlugu qajaasalerlugulu punnermut akuliussanik. Qaleralik raajallu taamatut nutaaliaralugit sananeqartut Royal Greenlandimit aningaasaliiffigineqarput.

- Kalaallip igasup arnap inuusuttup nunani avannarlerni Tuluillu Nunaanni igasut pikkorissorsuit akornanni peqataanera piginnaasat misigisallu pitsaasut Kalaallit Nunaanni pigineqartut paasilluarneqarnerannik kinguneqarpoq, Lykke Yakaboylu, Visit Greenlandimi pisortaanerugallartoq oqarpoq.

Aaqqissuussamit assit uani ataani takukkit: