Nunap inatsisaani pingaarnersaasoq

'Uagut, inuiaat, Naalagaaffiit Kattuttut naalakkersuisui inuiannik kiffartuussiniarlutik piusut uppernarsarparput'. Amerikamiut tunngaviusumik inatsisaani oqaaseqatigiit siulliit taamaapput.

'Franskit inuiaat ilumoorsaarlutik inuit pisinnaatitaaffiinut aamma naalagaaffiup namminersortuuneranut tunngaviusut akuersaarnerput nalunaarutigaarput', franskit tunngaviusumik inatsisaanni aallarniut taama nipeqarpoq.

Kalaallit inatsisaat qanoq nipeqarumaarnersoq, ukiuni arlalinni suli utaqqisariaqassavarput.

Innuttaasut peqataassapput
Kisianni amerikamiut aamma franskit assigalugit nunamut taama tunngaviutigissasoq, Naalakkersuisut siulittaasuata, Kim Kielsenip (S) qularutiginngilaa.

- Nunammi inatsisaani pingaarnersaavoq, taanna Sermitsiaq.AG-mut oqarpoq.

Tamannalu tunngavigalugu innuttaasut taassuma suliarineranut annertuumik peqataatinneqarnissaat, Kim Kielsenip tunngaviusutut isigilluinnarpaa.

Innuttaasut ilanngunneqarnissaat pingaaruteqarluinnarpoq. Tunngaviusumik inatsisilioqataasutut misigisimassapput.

Isumalioqatigiissitap aqqut toqqassavaa
Sapaatip-akunnerini kingullerni Kalaallit Nunaata namminiilivinnissaanut kisimi tunngasumik tunngaviusumik inatsimmik suliaqartoqassanersoq, imaluunniit Naalagaaffeqatigiinnerup iluani atuuttussamik, imaluunniit kingorna atuuttussamik suliaqartoqassanersoq annertuumik oqallisigineqarpoq.

Kim Kielsenip (S) maannamut sorliussaneranik aalajangiusimasaqarusunngilaq.

- Aqqutit marluk periarfissaliunneqarput, tunngaviusumik inatsimmut isumalioqatigiissitap suliani qanoq aaqqissuutissanerlugu pilersaarusiornissani aalajangissavaa, taanna oqarpoq.

Kim Kielsenip paasinninnera naapertorlugu, tunngviusumik inatsimmut isumalioqatigiissitap naammineq sulinermini aqqut sorleq toqqassanerlugu nalilissavaa.

Innuttaasunik ataatsimiititsinereernerup kingorna, innuttaasut aamma ilisimasallit tusareerlugit, isumalioqatigiissitap aqqut suna atorlugu ingerlaqqissanersugut siunnersuuteqarnissaminut isumalioqatigiissitap aalajangiisussanngornissani tikisissavaa.

Nalit akornanni suleqatigiinneq
Kisianni aqqut arlaat toqqaraluaraanni, Kalaallit Nunaannut namminersortumut tunngaviusumik inatsit naggataagut anguniagaasoq taassuma naqissuserpaa.

Kisianni innuttaasut Kalaallit Nunaata ullormi namminiilivinnermut taasineranni, Danmarkimut atassuteqaatit tamarmik kipineqarnissaannik tamanna isumaqanngilaq.

- Namminiilivinnissaq anguniagaraarput, ksianni tamanna inuulluaqqusivinnermik isumaqanngilaq. Suleqateqassaagut, kisianni tassani illuatungeriit naligiissaagut, Kim Kielsen (S) oqarpoq.

Nammineq isumaa naapertorlugu kinguaariit tullii tassunga aalajangiisussaapput.

Kim Kielsenip Kalaallit Nunaata namminersulivinnissaanut takorluugaanut allaaserisani pingasuusuni una kingulliuvoq. Apersorneqarnera tassaarsuaqannginnerani pivoq.

Allaaserisat siulii tamaasa uani atuarsinnaavatit:

Kim: Namminiilivinnissamut aqqut aalajangerneqareerpoq

Kim: Ilinniartitaaneq namminiilivinnissamut aqqutissaavoq