nunap assiliorneq

Nunap assingi digitaliusut piariingajalersut

Nunap assingi pisoqalisut aamma sermersuup aakkiartortup Nunatta nunataata assinginik nutaanik suliaqarnissaq pisariaqalersippaa. Siulliit ukiaru piariissapput.

Kortene over Grønland er ved at være forældede.

Kalaallit Nunaata nunataata maanna assingi eqqorpallaanngillat. Nunap assingi ukiorpassuit matuma siorna suliarineqarnerannit, sermersuup aakkiartortup nuna allanngortinnikuuaa.

Tamatuma saniatigut GPS-imut atorneqarsinnaanngillat.

Tamannali maanna iluarsiivigineqalerpoq. Nunap assingi digitaliusut siulliit ukiaru piariissapput.

Styrelsen for Dataforsyning og Effektivisering (SDFE), danskit nukissiornermut pilersuinermullu ministeriaqarfiata ataaniittoq nittartakkamini taama aallappoq.

Siullermi misiliutitut suliniut tassani pineqarpoq, piffinni sisamani nunap assinginik digitaliusunik suliaqartoqassalluni: Qeqertarsuup Tunua, kiisalu Narsap, Tasiilap aamma Zackenbergip eqqaani.

Piffiit nunap sermeqanngitsup 16 procentiata missaanik annertussuseqarput.

Nunap assingi qaammataasanit immiussat tunuliaqutigalugit suliarineqassapput.

- Nunap assingi eqqortut aamma paasissutissartaqarluartut silap pissusianik nakkutiginninnermut, upalungaarsimasunut, inuussutissarsiutinik ineriartortitsinermut, takornariaqarnermut aamma nunakkut angalasut sillimaniarnerannut aamma tunngatillugu pingaaruteqarput, SDFE nittartakkamini allappoq.

Annaasiniaanernut tunngatillugu periarfissat aamma pitsanngortissavaat.

- Nunap assingi nutaat atorlugit politiit annaassiniaasartullu qaammataasatigut qaammataasatigut sumiissusersiorsinnaalissapput, SDFE naqissusiivoq.

Nunap assingi digitalinngortinneqarpata nunap assinga ataasiinneq pineqarunnaassaaq, kisianni paasissutissat katersorneqartut atorlugit nunap assinginik atuisunut assigiinngitsunut tulluarsaalluni suliaqartoqarsinnaassaaq.

- Suliniummi ilusilersuineq Kalaallit Nunaanni atuisut peqatigalugit maanna ingerlanneqarpoq.

Powered by Labrador CMS