piumasaqaatit
Nunap assinga takuuk: Qalasersuaq pillugu oqartussaaffimmik piumasaqaateqalerpugut
Danmarki Kalaallit Nunaallu Qalasersuup imaata naqqanik FN-imut piumasaqaateqalerpoq. Qalaersuup imaata naqqa Danmarkimit 20-riaammit angineruvoq. Ruslandi Canadalu aamma piumasaqaateqassaaq
Qalasersuaq pigaarput. Issittumi imartaq 895.000 kvadratkilometeriuvoq Kalaallit Nunaata avannaaniilluni.
Danskit naalagaaffeqatigiinnermut diplomatii FN-ip allattoqarfissuanut New Yorkimut allakkanik ataasinngornermi taama nassiussissaaq.
Qalasersuup imaata naqqa Danmarkimit 20-aammit angineruvoq. Piumasaqaatigineqartorlu immap naqqariinnaraluaraa nunanut allanut ministerip Martin Lidegaardip Radikale Venstreneersup oqaluttuarisaanermut pingaaruteqartuusoq oqaatigaa.
- Naalagaaffeqatigiinnerup annertussusaata annertunerulersinnissaanut piumasaqarneq qaqutigoortuuvoq. Naalagaaffeqatigiinnerup annertunerulerneratigut nunarsuarmioqataanermi annertunerusumik akisussaaffeqalissaagut, uanilu Qalasersuaq taamatut periarfissiivoq, oqarpoq.
Danmarki Kalaallit Nunaallu Qalasersuarmi piumasaqaateqartuinnaanngillat. Ruslandi, Canada, Norge USA-lu aamma Qalasersuarmik oqartussaaffeqarnertik annertuserusuppaat.
Martin Lidegaard aamma oqarpoq nunat assigiinngitsut allat Qalasersuarmik oqartusaaffeqarusussasut.
- Pisoq eqqumiilaarpoq, Qalasersummi imaata naqqani atortussiaqanngilaq. Nunatummi anginerulernissamut Qalasersuaq assersuutaavoq, nunanut allanut ministeri oqarpoq.
Geusimi misissuisartoq Christian Marcussen oqarpoq misissuisartoqatinilu misissuereernermi kingorna Qalasersuarmik oqartussaaffeqarusunneq assersuutaannaasoq.
- Qalasersuup imaata naqqani uuliaqarnissaa gasseqarnissaaluunniit ilimanarpallaanngilaq. Taakkuninnga aamma piiaanissaq akisoorujussuussaaq, Christian Marcussen oqarpoq.
Danskit kalaallillu oqartussaaffeqarnissamik piumasaqaataat teknikkikkut apeqqutaasorujussuuvoq. Qalasersuup imartaata naqqa akisussaaffigineqarusuttumi takutinneqarsinnaasariaqarpoq Kalaallit Nunaannut nunatut toqqaveqartoq.
Qalasersuulli imartaata nunanut allanut Qalasersuup eqqaaniittunut aamma attuumassuteqartuunerat ajornartorsiutaaginnassaaq.
FN-ip taamaattumik ilisimatuunik 21-nik suleqateqarluni nalilersuissaaq nunanit piumasaqaatigineqartut. Nunat imminnut isumaqatiginninniartariaqassasut isumaqarfigineqarpoq.
Isumaqatiginninniarnerilli annertusinnaasut Martin Lidegaard oqarpoq.
- Isumaqatiginninniarnerit nalunassapput. Tamanna isertuunneqarsinnaanngilaq. Ilisimatusarnikkulli attuumassuteqarnissaa soqutiginarpoq.
Ruslandimik isumaqatiginninniarneq imaannaanavianngilaq. Tamanna oqaluttuarisaanermi isumaqatiginninniarnerni takuneqarsinnaavoq. Nuanut allanut ministerilli isumaqatiginninniarnissat ernumanartoqartinngilai.
- Qalasersuarmik oqartussaaffeqarniarnermi Ruslandimik imaaliallaannaq isumaqatigiissuteqarnissamik eqqarsarneq kukkunerunngila?
- Nunat tamarmik Ruslandi ilanngullugu isumaqatiginninniarnerit torersumik ingerlanneqarput. Arlaannik aaqqiagiinngissutaasinnaasunik suli ersiuteqartoqanngilaq, Martin Lidegaard oqarpoq.
Danmarkip Kalaallit Nunaatalu Qalasersuarmik oqartussaaffeqarnissamik piumasaqaataat nunap assingani ataani takuneqarsinnaavoq