Nunaoilip ataatsimeersuannginnerani ajoqqusersorneqarusunngitsut

Nunaoil A/S-imi kikkut siulersuisuni ilaasortaalissanersut Naalakkersuisunit pingasunngornerup ullaata tungaani toqqaassaaq. Siulersuisunngortut eqqissillutik sulisinnaanissaat anguniarneqassaaq, aatsitassanut politikkimi assinganik aamma anguniagaqartoqarpoq.

Suliffeqarfik Namminersorlutik Oqartussanit pigineqartoq Naalakkersuisunit oktobarimi 2014-mi aalajangerpoq sipaarniartoqassasoq. Naalakkersuisut taamatut aalajangernerat siulersuisuusimasunit iluarineqanngilaq.

Siulersuisuni siulittaasuusimasup Frank Dinhoff Pedersenip siulersuisooqatini peqatigalugit, Peter Helmer Steen minillugu, tunuarput.

Peter Helmer Steenilli siulersuisooqatini tunuarnerat tapersersorlugu oqariartuuteqarpoq.

Taama pisoqareersoq siulersuisuni ilaasortaagallartussanik Naalakkersuisut noqqaapput.

Amigartooruteqaraluarluni 'ingerlalluartoq'
Siulersuisuni ilaasortaasut tunuarmata Nunaoil 7 million koruuningajannik amigartooqqavoq. Tamanna aaqqinniarlugu Naalakkersuisut ullumi siulersuisunut ilaasortassanik toqqaassapput. Nunaoil amigartooruteqaraluarluni ingerlalluartuusoq Naalakkersuisut siulittaasuat Kim Kielsen marlunngormat tusagassiutinut nalunaaruteqarpoq.

'Nunaoil A/S ingerlalluartuuvoq aningaasaqarnikkut ajornartorsiunngitsoq', nalunaarummi allassimasoqarpoq.

Nunaoil Nunamineralsitulli aningaasarsiornikkut inissisimanngitsoq Kim Kielsenip oqaatigaa. Nunaminerals sapaatiummat nalunaaruteqarpoq 'suliffeqarfik akiliisinnaajunnaarnera pissutaalluni suliffeqarfik matuneqarnissaanut sulisoqartoq'.