Nunaoilimi aningaasarsiat Namminersorlutik Oqartussanit qaffasigineqartut

Nunaoil A/S-imi aalassassimaartoqarpoq.

Suliffeqarfiup inissisimanera pillugu partiit siulittaasui tamarmik ataatsimeeqatigiittariaqartut Inuit Ataqatigiit Naalakkersuisunut siulittaasuugallartumit Kim Kielsenimut Siumumeersumut siunnersuuteqarput.

Nunaoilimi siulersuisuni siulittaasup Frank D. Pedersenip Naalakkersuisunut Siulittaasup naalakkersuisoqarfiannik ataatsimeeqateqarsimanerata kingorna siulersuisunut siulittaasutut tunuarpoq.

Siulersuisuni ilaasortaasut Tine Pars, Olav Boye Sivertsen aamma Naja Joelsen tunuarput pingasunngormat.

Taamaallaat Peter Helmer Steen danskit naalagaaffiata sinniisuutitaa tunuanngilaq, taamaattoq siulersuisunut ilaasortat sinnerisa isummernerannut isumaqataasoq.

Nunaoil A/S-imi siulersuisunut ilaasortat amerlanersaat, danskit ilaasortaatitaat minillugu, siulersuisuni sulinerminnit tunuarmata Namminersorlutik Oqartussat uppernarsarpaat.

Selskabimi siulersuisut sinnerlugit siulersuisunut siulittaasup, Naalakkersuisut Siulittaasuata Naalakkersuisoqarfiata, Ingerlatseqatigiiffinnut Allaffeqarfiup, Aningaasaqarnermut Naalakkersuisoqarfiup aamma Inuussutissarsiornermut, Aatsitassaqarnermut Suliffeqarnermullu Naalakkersuisoqarfiup akornanni sivitsortumik oqaloqatigiittoqareersorlu tunuarniutit takkupput.

Aningaasartuutit
- Nunaoil A/S Namminersorlutik Oqartussat sinnerlugit, taamalu akileraartartut aningaasaataat atorlugit, sullissisuuvoq. Pilersaarutaasut naapertorlugit Nunaoilip 2018-imit ukiumut 10 million koruuninik aningaasaliiffigineqartalernissaata 2017-imut siuartinneqarnissaanik selskabip noqqaassuteqarnerata Naalakkersuisunngortussanut Inatsisartunngortussanullu aalajangiiffigisassanngortitsinnginnerani, Namminersorlutik Oqartussat siulersuisunut piumasaqarput selskabimi aningaasartuutit ikilisarniarlugit misissueqqissaarlutillu iliuusissatut pilersaarusiussasut.

, Namminersorlutik Oqartussani allaffimmi pisortaq Rasmus Pedersen tusagassiutinut nalunaarummi nassuiaavoq.

- Misissuinerup takutippaa aningaasartuutit qaffasissorujussuusut, ingammik aningaasarsianut aningaasartuutit selskabinut Namminersorlutik Oqartussanit pigineqartunut allanut sanilliullugit marloriaatingajammik qaffasinnerullutik, ilaatigut oqaatigaa.

Taamaammat ukiumut 10 million koruuninik taperneqartalernissamut kissaatip Naalakkersuisunit aalajangiiffigisassanngortinnginneranni siulersuisut piumaffigineqarput aningaasartuutit qaffasinnerujussuat qanoq iliorluni appartinnissaannut siunnersuuteqaqqullugit.

- Piumasaqaateqarneq ajoraluartumik siulersuisut tunuarnerannik kinguneqarpoq, tunngavilersuutigineqarluni Namminersorlutik Oqartussat piffissaanngitsukkut akuleruttut. Tamassuma kingunerisaanik siulersuisunik nutaanik toqqaanissaq siunertaralugu immikkut ittumik ataatsimeersuartoqartussanngorpoq, Rasmus Pedersen oqarpoq.