aatsitassat
Nunaoil amigartooruteqaqqittoq
Nunatsinni ingerlatseqatigiiffiup uuliamik niueruteqartup Nunaoilip 2015-mut naatsorsuutini saqqummiuppai
Nunaoil 2015-mi 6,6 millionit koruuninik amigartooruteqarpoq. Tamanna naammagisimaarnanngitsutut nipeqarsinnaagaluarpoq, kisianni siulersuisut annertunerusumik amigaartooruteqarnissartik naatsorsuutigisimagaluarpaat.
Uulia akikinnerusoq
Ingerlatseqatigiiffik siusinnerusukkut sajuppillatsisinernik tunisaqartarnikkut annertuumik kaaviiaartitaqartarsimavoq, ukiunili kingullerni ukiuni kingullerni sajuppillatsitsinikkut paasissutissanut aningaasaliineqartarsimanngimmat paasissutissanik tunisaqarnikkut kaaviiaartitaqarnissaq tamatumuunalu aamma ingerlatseqatigiiffimmi sinneqartooruteqarnissaq ilimagineqanngilaq.
Nunaoilip aamma iluaqutiginngilaa uuliap akiata appariartuinnarnera, Issittumilu uuliasiorneq akisuallaarlunilu ajornakusoorpallaartutut isigineqarluni.
Nunarsuaq tamaat isigalugu 2015-imi tunisassiornermi ukiuni siuliini tallimani tamani 20 procentimik annikinnerusut uuliasiornermut atorneqarsimapput.
Kisianni siulersuisut naatsorsuutigaat, niuerneq illuanut saaqqikkumaartoq, uuliap akia nikerartarnerujussua ilisimaneqarmat, ingammik piffissap sivisunerusup ingerlanerani.
Nunatsinni ilisimatusarneq annertunerusoq
- Ilumoorporli ukiuni aggersuni uuliamik tunisassiorneq tamarmiusoq imaannaanngitsunik anigorniagassanik naleqqussaanernillu nalaataqartartussaasoq, ingerlatseqatigiiffik nalunaarummi allappoq.
Taammaattumik Nunaoilip ilaatigut erhvervsPhD, Kalaallit Nunaanni uuliasiornerup soqutigineqarnerulernissaanik uuliasiornermilu ajoqutaasinnaasunik aningaasartuutitaanillu annikilliliinermik siunertaqartoq, akuersissummik pissarsissutigisimavaa.
Oqaatigeriikkatut Nunaoilip sinneqartooruteqarnissartik naatsorsuutiginngikkallarpaa. Ukioq manna amigartooruteqarnissamik siornamit annertunerusumik naatsorsuuteqarput, taanna amigartoorut 7 millionit koruuniuvoq.
Nunaoil ullumikkut ukiunik 30-nngortorsioraluarluni immiartorfinnit champagnemik najoqqaanngillat.
Nunaoil 1984-imi Tunumi Jameson Landip nunataata avataani uuliasiornermut akuersissummik tunineqarneranut atatillugu pilersinneqarpoq.
Tunup Avannaa
Ukiuni aggersuni uuliasiornermi sulineq pingaartumik Baffinip Kangerliumarngani akuersissutip attatsip arlaqartulluunniit piffissami allami ilaatinneqassanersut aalajangiineqassanersoq sunnersimaneqarumaarpoq.
Ukiuni kingullerni marlussunnituulli Nunaoilip naatsorsuutigaa uuliasiornermi aamma 2016-imi Grønlandshavep Tunup avannaata imartaa, akuersissutaateqartut suliassanik pilersaaruttaannut atatillugu suli paasissutissanik katersuiffiusoq, sammineqarumaartoq.
Nunami uuliasiorluni iliuuseqarnerit ukiuni tulliuttuni marlussunni, qanittukkut akuersissutinik Jameson Landimi tunniussaqarnermi aammalu Diskomi Nuussuullu Qeqertaasaani 2016-imi pilersaarutaasumik nutaamik qinnuteqartussarsiuussineqarnerani, annertusisussaassapput.
Atuaruk: Issittumi misissuinissamit nutaamit Shell tunuartoq