assammik arsarneq
Nunanut unammisartunut sungiusaasoq: Meeqqanik inuusuttunillu inerisaaneq siunissamut pingaaruteqarpoq
Kalaallit Nunaanni assammik arsartarneq meeqqanit aallartittariaqartoq, angutit nunanut unammisartuinut sungiusaasoq oqarpoq
Nunatsinni assammik arsarnermi allannguuteqartoqarnissaa pisariaqartoq nunanut allanut unammisartuusimasoq Ulf Abrahamsen sapaatip akunnerata siuliani Sermitsiaq.AG-mut isumaliutersorpoq.
- Timersoqatigiiffiit pikkorinnerit sanngiinnerusunut unammisarnertik pitsannguutigineq ajorpaat. Timersoqatigiiffiit pitsaanerit imminnut unammisinneqartalernissaat aamma sanngiinnerusut assinganik unammisinneqartalernissaat siunnersuutigisinnaavara, Ulf Abrahamsen Sermitsiaq.AG-mut ilaatigut oqarpoq.
Taamatulli siunnersuuteqartoqarnera assammik arsarnermi nunanut allanut unammisartunut sungiusaasup isumaqatiginngilaa.
- Timersoqatigiiffiit pitsaanerusut sanngiinnerusunut unammileraangamik inuusuttortatik imaluunniit unammisartutik unammersuaarnermut peqataanngitsunik unammititsisalersinnaanissaat siunnersuutigisinnaavara, Niels Møller Sermitsiaq.AG-mut oqarpoq.
Tamanut sullissineq
Kalaallit Nunaannili assammik arsarnerup qaffasissusaa appariarsimasoq nunanut allanut sungiusaasup oqaatigaa.
- Ukiuni kingulliunerusuni ajornartorsiuteqarpugut tassami timersoqatigiiffinni ilaasortaasut ikileriarnikuupput. Unammisartut pitsaassusaat annikilleriarnikuuvoq. Kisianni ataatsimoorluta qaffassaaqatigiissinnaavugut, Niels Møller oqarpoq.
Nunanut allanut unammisartut sungiusaasutut pikkorissarneqarsimasut oqaatigaa. Taakkumi aamma timersuutip qaffariarnissaanut akisussaaqataasut nunanut allanut unammisartunut sungiusaasoq oqarpoq.
- Nunanut allanut unammisartut tamarmik Nuummiunngillat. Unammisartut meeraallutik timersoqatigiiffimmik ilaasortaaffigisaannut sungiusaajartussapput aamma sungiusaasunut siunnersuiartussapput. Attaveqaqatigiiginnavittassapput. Sungiusarnerat aaqqissorluarneqalissaaq, Niels Møller oqarpoq. Timersuut ineriartorluarnissaa aamma upperilluarpaa.
Timersoqatigiiffiit akisussaassuseqartariaqartut
Taamaakkaluartorli sungiusarnerit pimoorunneqarnerusariaqartut oqaatigaa. Ukioq kaajallallugu sungiusartoqartalertariaqartoq siunnersuutigaa.
- Nunanut allanut unammisartut arfinillit imaluunniit arfineq pingasut takutitsilluartuusussaapput. Inuunerissaartussaapput sungiusarnermut tunniusimasut. Imaassinnaavoq pikkorissunik unammisartoqaraluartoq, kisianni takutitsilluanngikkunik pitsaasumillu inooriaaseqanngikkunik nunanut allanut unammisartutut toqqarneqarnissartik naatsorsuutigissanngilaaq, oqarpoq.
Assammik arsartartut kattuffiat kisimi akisussaaffimmik tigusissanngitsoq oqarpoq. Timersoqatigiiffiit aamma piumassuseqartariaqartut oqaatigaa.
- Timikkut nukittorsartoqarnerusariaqarpoq. Taanna pingaaruteqartorujussuuvoq, tamannalu timersoqatigiiffiit namminneerlutik akisussaaffigissavaat. Sungiusartarnerit maannakkumit aamma aallartinneqartalertariaqarput, sungiusariaatsit allanngorartinneqartariaqarputtaaq unammisartut piumassuseqaannarnissaat anguniarlugu, Niels Møller oqarpoq.