Wednesday, August 2, 2017 - 15:31

Nunanut allanut unammisartut peqataajunnaarnissartik eqqarsaatigaat

Nunanut allanut unammisartut paatsoorneqarsinnaanngitsumik KNAK-p siulersuisuinut kaammattuuteqarput: Tunuaritsi
Assi.: Nukappiaaluk Hansen
KNAK-p sungiusaasoq Tekle Ghebrelulimik soraarsitsisimanera pillugu nunanut allanut unammisartut ingerlaannassanerlutik eqqarsaatigaat. Taakku KNAK-p siulersuisuisa tunuarnissaanik kaammattuipput.

Kalallit isikkamik arsaannermik nunanut allanut unammisartuinut kusanaatsuliat ullormiit ullormut ajorsiartuinnarput. Sisamanngormat KNAK-mi siulersuisuisa nunanut allanut unammisartut sungiusaasuat Tekle Ghebrelulimik soraarsitsinerat pillugu naassanngiusattumik isornartorsiorneqarnerannik malitseqarpoq. KNAK-lli siulittaasua John Thorsen aamma futsalimik nunanut allanut unammisartunut suingaasup ingerlaannaq atuutilertumik tunuarnerisa kingorna isornartorsiuvineq annertuseriaannarsimalluni.

Aamma atuaruk: Nunanut allanut unammisartunut sungiusaasoq tupaqqasoq: Soraarsitaavunga

Nunanut allanut unammisartunut saassussisartoq Norsaq Lund Mathæussen, futsalimik aamma isikkamik arsaattartut nunanut allanut unammisartut minnerpaamik 20-t sinnerlugit KNAK-mi siulersuisut iliuuserisimasaat isumaqatigalugu, Sermitsiaq.AG-mut ataatsimoorussamik allagaqarsimapput.

- Sungiusaasutta Tekle Ghebrelulip soraarsitaariataarnera kingornalu sungiusaasup Rene Olsenip kiisalu KNAK-mi maanna siulittaasuusimasup, John Thorsenip soraarnera aliasuutigaarput. Tassami kalaallit isikkammik arsaannermi nunanut allanut unammisartuini atatitsinerpaallutillu taarserneqarsinnaanngitsuupput.

Aamma atuaruk: KNAK siulittaasua nunanut allanut sungiusaasoq soraarseriarlugu tunuartoq

- Soraarsitsinermut pissutaasoq: Timersortartorpalaanngitsumik pissuseqarneq. Uagut ilisimasagut naapertorlugit sungiusaasut Tekle Renelu taakkuluunniit immikkoorlutik nunanut allanut unammisartuni ukiuni taakkunani sungiusaasorineranni uagutsinnut allalluunniit sungiusaaffigisimasatik timersortartorpalaanngitsumik pissusilersuuteqarfigisimanngilaat. Sungiusaasut taakku timersoqatigiiffitsinni sungiusaasoralugit piumassuseqarluarnertik unammerusussuteqarluarnertillu takutittarpaat, taamaaliornerminni sineriammi sungiusaasut allat assigalugit killissap iluani akuersaarneqarsinnaasumik pissusilersortarput. Tamanna pissutigalug siulersuitut suna pissutigalugu Teklemik soraarsitsisimanerat paasisinnaanngilluinnarparput, nunanut allanut unammisartut paasissutissiipput.

Unammisartut Maniitsumi futsalimik GM-ertoqarnera eqqaavaat, tassani pisimanerakkat arlallit, ilaatigut Tekle Ghebrelulip meeqqamulli tunngasoq inuit naapeqatigiittarfiini pisimanerakkat annertusiartupallassimallutik. Pisumulli uppernarsaatissaqannginneq unammisartut pingaartippaat.

Aamma atuaruk: KNAK aningaasaliisartunik annaasaqariaannaavoq

- Inoqatitsinnik ingammik meeqqanik nakuusertarneq tamatta akerleraarput, kisianni (Maniitsumi aaqq.) pisumut paasissutissat saqqummersimasut pillugit, uagut tungitsinniik KNAK kukkorujussuarpoq paasissutissanillu eqqortunik amingaateqarpoq, ilumut Maniitsumi pisumut paasissutissaqarpat. Taamaammat kanngunartuliami uani uagut Teklemut tapersersuivugut, nunanut allanut unammisartut erseqqissaapput.

- Tullertut saqqummiunneqarpoq silami GM-imut anngunniunnermi pisoq, tassani Tekle snapchatikkut aapakaatut bananitortartutut nittarsaanneqarluni. Pisoq tamarmi Sermitsiaq.AG-mi saqqummerpoq, tassani ullut dommerip ullut arlallit qaangiunnerini, sinaani dommeriusoq, piffissami tassani nunanut allanut angalasoq, kaammattorpaa Tekle unammisaminut imaluunniit nerrivimmi dommerinut qiterlimik nittarsaassisimasutut nalunaarutigeqqullugu. Nalunaarutiginninnermilu tusarneqarsimavoq, dommerip Tekle taliminik ussersortoq takusimagaa, kisiannili qiterliminik nittarsaassisimanersoq qulakkeersinnaannginnamiuk taama inerniulitiinnarsimallugu. Tassanilu aamma soraarsitsinermut tunngavilersuutip uppernarsaatitai ersarinngillat, tamannalu
KNAK-p siulersuisuinit kukkunerujussuulluni. Taamatulli eqqaaneqarsinnaavoq dommeri dommereqatiminik pisumik nalunaarutiginninnissaanik kaammattuisoq KNAK-p siulersuisuini ilaasortaammat, taannalu soraarsitsinissamut taaseqataasimalluni, nunanut allanut unammisartut allapput.

Aamma atuaruk: Futsalimi unammisartunut sungiusaasoq taamaatippoq: GBU-mut tatiginninngilanga

Unammisartut aamma eqqaavaat Tekle nuanut allanut unammiartornerit nalaanni aaqqissuisunit unammisanilluunniit unnerluutigineqarsimanngisaannarnera. Piviusut allanngortitserneqarsimasut unammisartut isumaqarput.

- Pisut allat unammisatsinnit nassaajupput, tassami sungiusaasoq sungiusaanermikkut ingerlalluartorujussuuvoq. Ajonerpaavorli siulersuisuusut sineriammi timersoqatigiiffimmit allaminngaanneersuummata, sungiusaasulli peqatigiiffimmut ajungaasaqattaartitsisoq peersinniarlugu pisuusaartitsilluarsinnaallutik.

Aamm atuaruk: KNAK: Nunanut allanut unammisartut sungiusaasuata soraarsitaasup isumaqatigiissutini malinngilaa

Massakkut siulersuisut siulersuisuutillugit unammisartuuginnarnissaq toqqissisimanaranilu piumassuseqarnanngitsoq, unammisartut allapput.

- Matumuuna pisumi siulittaasut ingerlatsinerlunneranni nunanut allanut unammisartutut inissisimaannassanerluta eqqarsaatersuutigingaatsialerparput, neriuppugullu siulersuisut minitaqaratik tamavimmik tunuarlutik allanik nutaanik siulersuisoqalerumaartoq, isikkamik arsaallutik nunanut allanut unammisartut naggasiillutik allapput.

Seneste nyheder / Nutaarsiassat kingulliit