Sungiusaasumik soraarsitsineq
Nunanut allanut unammisartunut sungiusaasuusimasup isumaqatigiissutigisimasaa isertuunneqarpoq
KNAK-p Tekle Ghebrelulip sungiusaasutut soraarsitsineranut tunngavilersuutit ilagaat tusagassiuutinut oqaaseqannginnermini KNAK-p siulersuisuinut paasissutissiisimannginnera. Tamanna isumaqatigiissutaani ersittussaangaluarpoq, isumaqatigiissummilu qanoq allassimasoqarnersoq siulersuisut uppernarsarusunngilaat.
Julip qaammataani angutit isikkamik arsaallutik nunanut allanut sungiusaasuat Tekle Ghebrelul soraarsitaavoq.
Tamatuma kingorna Kalaallit Nunaani Arsaattartut Kattuffiani siulittaasoq John Thorsen tunuarpoq, sungiusaasorli alla René Olsen siulersuisunut tatiginnikkunnaarluni nammineq aamma tunuarluni.
Tekle Ghebreluli, KNAK-mi siulittaasunngortoq Gert Fleischer naapertorlugu, Snapchatimi pisoq KNAK-p siulersuisuinut nalunaarutiginagu tusagassiuutinut saaffiginnissamanera, soraarsitaaneranut tunngavilersuutit ilagaat.
- Tekle Ghebrelulip isumaqatigiissutini malinngilaa, tamannalu pissutigalugu siulersuisut iliuuseqarput taanna soraarsillugu, Gert Fleischer qaammatip aallartilaarnerani Sermitsiaq.AG-mut oqarpoq.
Isumaqatigiissut isertuunneqarpoq
Gert Fleischer naapertorlugu Tekle Ghebreluli tusagassiuutinut saaffiginnissuteqannginnermini KNAK-mut ilisimatitsisimasariaqaraluarpoq, tamannalu soraarsitaassutigaa.
- Nunanut allanut unammisartunut sungiusaasup ilisimassavaa isumaqatigiissummut pituttorsimasuunini. Pisut KNAK-mut tunngassuteqartillugit, nunanut allanut unammisartunut sungiusaasoq tusagassiuutinut attaveqannginnermini siulersuisunut ilisimatitseqqaartussaavoq. Uagut aamma siulersuisuni ilaasortat siulersuit ilisimateqqaarnagit, pisut tusagassiuutinut oqaluttuarisinnaanngilagut, Gert Fleischer sungiusaasumik soraarsitsisimanermut apersoneqarnermini oqarpoq.
Taamaammat sungiusaasuusimasup Kalaallit Nunaani Arsaattartut Kattuffianut isumaqatigiissutigisimasaa qanoq imaqarnersoq takujumallugu Sermitsiaq.AG saaffiginnissimangaluarpoq. Isumaqatigiissulli siulersuisut saqqummiunnissaa kissaatiginngilaat.
Nunanut allanut unammisartut sungiusaasuanik soraarsitsinermut tunngasut uani atuakkit