isikkamik arsaanneq

Nunanut allanut unammisartunut sungiusaasoq tupaqqasoq: Soraarsitaavunga

Kalaallit isikkamik arsaannermik nunanut allanut unammisartuisa sungiusaasuat, Tekle Ghebrelul, ukiuni sisamani sungiusaasooreerluni ingerlaannaq atuutilertumik soraarsitaavoq.

"Nunanut allanut unammisartut sungiusaasuata oqallisaanera qatsullugu" siulersuisuni amerlanerussuteqartut Tekle Ghebrelulip soraarsinneranut tunngavilersuutigigaat, KNIAK siulittaasua, John Thorsen soraarsitsisuuvoq.

Nunanut allanut unammisartunut sungiusaasoq tupaqqasoq

Tekle Ghebrelulip soraarsitaanini tupaallaatigaa, ammillu qalipaataanik immikkoortitsinermut tunngasut nassuiaateqarfigisinnaasimannginnamigit aammattaaq aliasuutigaa.

Kingullermik nunanut allanut unammisartut sungiusaasuat Snapchatimi aapakaatut nittarsaanneqarpoq, angulli taama nittarsaassisuusoq kingorna isikkamik arsaattartut kattuffianit unammeqqissinnaajunnaartitaalluni.

Aamma atuaruk: Nunanut allanut unammisartunut sungiusaasoq aapakaatut nittarsaanneqartoq

Nunanut allanut unammisartut sungiusaasuat ammip qalipaataanik immikkoortitaanermik misigititaasimasoq aammattaaq unnerluutigineqarpoq.

Sungiusaasoq unnerluutigineqartoq

Unnerluutiginninnerlu tassaavoq taanna meeqqaamik attuisimanngikkuni issuttuussisimasoq.

- Meeqqamik attuisimanngikkuma issuttuussisimaneraallunga paasivara. Kisianni naak meeqqap angajoqqaavi. Angajoqqaavinit tigussaasumik saaffigineqarsimanngilanga. Salluliorneruna. Tamanna tunngavingalugu soraarsitaanera tupaallaatigaara, unnerluutiginninnernummi nassuiaatinneqarsimanngilanga, Tekle Ghebrelul Sermitsiaq.AG-mut oqarpoq.

Tunngavilersuutit ilisimanngikkai

Taanna soraarsitaanerminut suut tunngavilersuutigineqartut ilisimanngilai. Nalunngisaa tassaavoq tassanngaannaq atuutilertumik soraarsitaalluni.

- Tamanna paasiniartariaqarpara, nunanut allanut unammisartut sungiusaasuat pakatseqqangaatsiarluni oqarpoq, taanna ullumi

B-67 Nuumminngaanneersup siulersuisui ataatsimeeqatigisimavai. Tassani ammip qalipaataanik immikkoortitsisarneq qanoq unitsinneqarsinnaanersoq qanorli pitsaanerpaamik iliorfigineqartassanersoq eqqartorneqarsimalluni.

Ataatsimiinnermilu oqallinnerup nukkittorsarneqarnissaa pillugu KNIAK-p siulittaasua aggersarneqassasoq, nunanut allanut unammisartut sungiusaasuata siunnersuutigisimavaa.

Soraarsitsineq ilimagineqanngitsoq

KNIAK-lli siulittaasua John Thorsen aggersaanermut akuersisimavoq.

Tekle Ghebrelulillu ilimaginngilluinnangaanik taanna nunanut allanut unammisartunut sungiusaatut soraarsitsinermik nassataqarsimasoq, taanna nassuiaavoq.

Powered by Labrador CMS